प्रज्ञा–प्रतिष्ठानको ४० औँ प्राज्ञ सभा सम्पन्न

शन्तबहादुर तामाङ
शन्तबहादुर तामाङ संवाददाता
98 Shares
काठमाडौं

चालु आर्थिक वर्षका लागि कार्यक्रम र बजेट पारित गर्न नेपाल प्रज्ञा–प्रतिष्ठानको ४० औँ प्राज्ञ सभाको उद्घाटन सत्र भएको छ ।

बुधवार प्रतिष्ठानका पूर्व कुलपति वैरागी काइँलाले शुभारम्भ गरिएको सभामा प्राज्ञ परिषदद्वारा पारित भएका कार्यसूची र निर्णय अनुमोदन गरिने भएको छ ।

सभामा आर्थिक वर्ष २०७९/८० को कार्यक्रम तथा बजेटको वार्षिक प्रतिवेदन र आर्थिक वर्ष २०८०/८१ कार्यक्रम तथा बजेट अनुमोदन, प्रतिष्ठानको नियमावली २०६७, कलाकार तथा कर्मचारी सेवासम्बन्धी नियमावली २०७७‚ र आर्थिक प्रशासन नियमावली २०७९ का केही नियममा समसामयिक संशोधनका कार्यसूची रहेका छन् ।

पूर्व कुलपति काइँलाले राज्यले प्राज्ञिक निकायलाई पर्याप्त बजेट नदिएर उपेक्षा गर्ने गरेको बताए । उनले बजेट वृद्धिका लागि प्रतिष्ठानका कुलपति र सदस्य सचिव मन्त्रालयका उपसचिव तथा सहसचिवको कार्यकक्षमा धाउनुपर्ने बाध्यता आफूहरूले पनि व्यहोरेको सुनाए ।

प्रतिष्ठानका कुलपति भूपाल राईले सबै भाषा, सबै ज्ञान, सबैको प्रज्ञा–प्रतिष्ठान भन्ने उद्घोषसहित आफूहरूले कार्य प्रारम्भ गरेको उल्लेख गर्दै व्यवस्थापिका, कार्यपालिका र न्यायपालिकापछि प्राज्ञिक क्षेत्रलाई प्राथमिकता दिनुपर्नेमा प्रस्ताव गरे ।

राजनीतिज्ञ र कर्मचारीतन्त्रले प्राज्ञिक क्षेत्रलाई महत्त्व नदिएको गुनासो गर्दै उहाँले ज्ञान र विचारको विकेन्द्रीकरण गर्ने पक्षमा आफूहरू अग्रसर रहेको उल्लेख गरे ।

भाषा आयोगका अध्यक्ष गोपाल ठाकुरले सबै राष्ट्रभाषाको प्रज्ञा– प्रतिष्ठान हो भन्ने मान्यता र सोचलाई आत्मसात् गरेर काम गर्न सुझाव दिए ।

नेपाल सङ्गीत तथा नाट्य प्रज्ञा–प्रतिष्ठानका कुलपति निशा शर्माले प्रज्ञा–प्रतिष्ठानलाई व्यवस्थित रूपमा सञ्चालन गर्न कानुन संशोधन हुनुपर्नेमा जोड दिए । त्यस्तै ललितकला प्रज्ञा–प्रतिष्ठानका कुलपति नारदमणि हार्तम्छालीले तीन वटै प्रज्ञा–प्रतिष्ठानबिच सहकार्य हुनुपर्ने आवश्यकता औँल्याए ।

यसै गरी प्रतिष्ठानका उपकुलपति विमलकृष्ण श्रेष्ठ विमल निभाले प्राज्ञिक क्षेत्रमा महत्त्वपूर्ण काम गर्ने बताए ।

कार्यक्रमको सञ्चालनका क्रममा प्रतिष्ठानका सदस्य सचिव डा. धनप्रसाद सुवेदीले प्रतिष्ठानलाई समावेशी चरित्रको बनाउँदै सबैलाई समेट्ने बताए ।

कार्यक्रममा प्रतिष्ठानको नयाँ प्रकाशन ‘समाज अनुसन्धान’ पत्रिका विमोचन गरियो । यस पत्रिकाको प्रधान सम्पादकमा प्राज्ञ परिषद् सदस्य तथा सामाजिक शास्त्र विभाग प्रमुख डा. कौशिला रिसाल ,सम्पादन मण्डलमा प्राज्ञ सभा सदस्यद्वय नारायणप्रसाद मरासिनी र नवीन जिरेल ,गोकुल पोखरेल,प्रकाश थापा मगर ,सरोजदिलु र कार्यकारी सम्पादकमा नारायण शर्मा रहेका छन् ।

कार्यक्रममा संस्कृति, पर्यटन तथा नागरिक उड्डयन मन्त्री एवम् प्रज्ञा–प्रतिष्ठानका संरक्षक सुदन किराँतीका पिता हर्कबहादुर राई कीर्तिशेष भएकाले उपस्थित हुन सकिएन। यस शोकको दु:खद घडीमा उहाँका पिताप्रति हार्दिक श्रद्धाञ्जली तथा मन्त्री किराँतीलगायत परिवारजनमा प्राज्ञ सभाले गहिरो समवेदना प्रकट गर्‍यो ।

तपाईको प्रतिक्रिया