तन्नेरी चासोले आयोजना गरिएको ‘वैदेशिक रोजगारीले देश विकासमा योगदान पुर्याउँछ’ भन्ने वादविवाद प्रतियोगितामा कन्चन तामाङको पक्षले प्रथम स्थान हासिल गरेको छ ।
कुनै पनि विषयमा वस्तुमा युवाले तार्किक क्षमताको विकास गर्ने उद्देश्यले आयोजित माध्यमिक विद्यालयका विद्यार्थीहरुबीच भएको वादविवादमा कन्चनको पक्ष प्रथम भएको हो ।
कन्चनको पक्षबाट तिर्सना श्रेष्ठ, निकिता बस्नेत र बन्दिका मुगरातीको टिमले ‘वैदेशिक रोजगारीले देश विकासमा योगदान पुर्याउँछ’ भन्दै तथ्यगत विवरणहरू पेस गरेका थिए । सरल भाषा, विषयगत अध्ययन, अर्थपूर्ण तार्किक विचारका कारण कन्चनको टिमले प्रथम स्थान हासिल गर्न सफल भएको निर्णायक मण्डलका संयोजक नवीन सिलवालले बताए ।
यस्तै, दावा तामाङको टिम उप विजेता भएको थियो । अविनाश बुढाथोकी, रिचा दुलाल, अजपा शिवाकोटीसहित दावाको टिमले वैदेशिक रोजगारीले देश विकासमा योगदान पुर्याउँदैन भन्ने पक्षबाट तर्क पेस गरेका थिए ।
दावाको टिमले पनि उत्तिकै प्रभावकारी ढङ्गले तर्क पेस गरेको थियो ।
पक्ष र विपक्षले प्रभावकारी ढङ्गले तर्क पेस गरे पनि निर्णायक मण्डलले ‘वर्ल्ड स्कुल डिबेट च्याम्पियनसिप’ को फरम्याट अनुसार निर्णय सुनाएका थिए ।
तन्नेरी चासाले विगत दश वर्षदेखि ‘गुनासो होइन, प्रश्न गरौँ’ भन्दै युवाहरूलाई सार्वजनिक चासोको विषयमा सरोकारवाला पक्षलाई खबरदारी गर्न प्रेरित गरिरहेको छ ।
मङ्सिर ११ गतेबाट गौरीशङ्कर बहुमुखी क्याम्पसमा डिबेट तालिम सुरु गरिएको थियो । उक्त तालिममा विभिन्न विद्यालयका ३१ जना विद्यार्थीहरू सहभागी भएका थिए । सहभागी विद्यार्थीहरूले यो डिबेट नयाँ रहेको र सिकेपछि सार्वजनिक विषय वस्तुमा प्रश्न गर्न आत्मबल बढेको बताए ।
तन्नेरी चासोका सिइओ नवीन सिलवालले देशको सामाजिक, राजनीतिक, सुशासन र भ्रष्टाचारको विरुद्ध विभिन्न माध्यमबाट खबरदारी गर्दै आइरहेको र खबरदारी गर्ने विभिन्न टुलमध्ये युवाहरूलाई डिबेटको माध्यमबाट सार्वजनिक चासोमा बहस गर्न उत्प्रेरित गरिएको बताए ।
कार्यक्रमका प्रमुख अतिथि भीमेश्वर नगरपालिकाको मेयर ईश्वर नारायण मानन्धरले तन्नेरी चासोको अभियानले समाजका युवाहरूलाई सकारात्मक प्रभाव पार्ने धारणा व्यक्त गरे ।
मेयर मानन्धरले समाजलाई सकारात्मक प्रभाव पार्ने कार्य गर्न युवाहरूलाई आग्रह गर्दै प्रथम भएको टिमलाई बधाई तथा शुभकामा दिएका थिए ।
भीमेश्वर नगरपालिकाका प्रवक्ता तथा वडा नम्बर ४ का अध्यक्ष तारानाथ चौलागाईँले समाजमा यस्ता बहस आवश्यकता बढ्दै गएको भन्दै आफ्नो वडामा डिबेट कार्यक्रम गर्ने बताए ।
यस्तै कार्यक्रममा कालिन्चोक माध्यमिक विद्यालयका प्रधानाध्यापक शम्भु गौतम, गौरीशङ्कर बहुमुखी क्याम्पसका सहायक प्राचार्य सुवास रिमाल, द राइजिङ स्टार स्कुलका प्रेम प्रसाद अधिकारी लगायतले मन्तव्य राखेका थिए । सो तालिममा ट्रेनर गणेश बुढाथोकी र साम्भवी चापागाईँले प्रशिक्षण दिएका थिए ।
तन्नेरी चासोका निर्देशक दीपज्योति श्रेष्ठको सभाध्यतामा कार्यक्रम भएको थियो ।
