गृह मन्त्रालयबाट सरुवा भई गत कार्तिक २२ गते जिल्ला प्रशासन कार्यालय रसुवामा प्रमुख जिल्ला अधिकारीको जिम्मेवारीमा आउनुभएका वेदनिधि खनालसँग जिल्लाको समसामयिक विषयमा रसुवा संवाददाता सरस्वती न्यौपानेले गरिएको कुराकानी :
रसुवा जिल्लामा प्रमुख जिल्ला अधिकारी (प्रजिअ)भएर आउँदा तपाईँलाई कस्तो अनुभूति भयो ?
म गृह मन्त्रालयबाट कार्तिक २२ गते प्रमुख जिल्ला अधिकारीका रूपमा यस जिल्लाको जिम्मेवारीमा आइपुगेको छु । हिमाली जिल्ला भए पनि चीनको उत्तरी नाकासँग जोडिएको र मिश्रित जातजातिको बसोबास भएको जिल्ला हो । प्राकृतिक सुन्दरता, स्वच्छ वातावरण, झुरुप्प रहेका बस्तीहरू र मधुर आतिथ्यताका कारण जिल्लामा आउँदा एउटा अनुपम अनुभूति पाए ।
निजामती सेवामा प्रवेश गर्न अरूबाट प्रेरित हुनुभयो कि आफ्नै प्रयास हो ?
म सेवामुखी व्यक्ति हुँ । यस क्षेत्रमा प्रवेश गर्नु अगाडि करिब ६ वर्ष शिक्षक थिए । सेवाको स्थायित्व र निरन्तरता खोच्दाखोच्दै यता प्रवेश गरेको हुँ । यस सेवामा कार्यरत अग्रजहरूलाई देखेर पनि प्रवेश गर्ने उत्सुकता भएको थियो ।
प्रमुख जिल्ला अधिकारी भएर अहिलेसम्म कति जिल्लामा काम गर्नुभयो ? अरू जिल्लाको तुलनामा रसुवा जिल्ला कस्तो लाग्यो ?
प्रमुख जिल्ला अधिकारी कै रूपमा काम गरेको यो मेरो चौथो जिल्ला हो । यद्यपि मैले गृह प्रशासनमा २१ वर्ष भन्दा बढी काम गरिसकेको छु । अन्य जिल्लाको तुलना गर्दा यो जिल्लामा सेवाग्राहीको चाप कम देखियो । कर्मचारी पनि कम हुन्छन् । स्थानीय तहको गठन अगाडि प्रमुख जिल्ला अधिकारीहरू बढी व्यस्त हुन्थ्यो । हाल थोरै जनसङ्ख्या भएको जिल्लामा व्यस्तता घटेको छ । हाल यो जिल्ला तुलनात्मक रूपमा सुरक्षित र शान्त देखियो ।
कार्यालयमा आउने सेवाग्राहीलाई सहज सेवा प्रवाहका लागि कार्यालयमा कस्तो खाले संयन्त्र बनाउनुभएको छ ?
यहाँ सोधपुछ कक्ष छ । नागरिक बडापत्र छ । कर्मचारीहरूले सेवामैत्री व्यवहार गर्छन् । सूचना अधिकारी र गुनासो सुन्ने अधिकारी तोकिएको छ। परिसरमा स्तनपान कक्ष, टेलिभिजन‚ पिउने पानी, बच्चा खेल्ने ठाउँ, प्रतीक्षालय, बगैँचा आदि छन् । सेवाग्राहीका कामहरू आफै खटेर गरिदिने कर्मचारी छन् । म आफै पनि सेवा प्रवाहमा सहजिकरण गर्ने गरेको छु ।
जिल्ला प्रशासन कार्यालय रसुवाबाट प्रवाह हुने सेवाबारे थप बताईदिनुस न ?
हाम्रो सेवामा कुनै समस्या र कमी छैन । पछिल्लो समय विगतदेखि अड्केर बसेका नागरिकताको समस्या, मुद्दाका समस्याहरू पनि समाधान गर्दै आइरहेको छ । हामीले विद्युतीय माध्यमबाट आउने निवेदन र गुनासोहरूलाई पनि सकेसम्म र मिलेसम्म सम्बोधन गरेका छौँ ।
रसुवामा सेवारत भर्खरै हो । सेवाग्राहीका समस्या समाधानमा सफल हुन्छु जस्तो लाग्छ तपाईँलाई ?
हाम्रो आफ्नो कार्यालयका सेवाग्राहीका समस्या समाधानमा कुनै कसुर बाँकी हुँदैन र राख्नेछैन पनि । केही अभिलेख नै नभएको समस्याहरूको समाधानमा भने समय लाग्छ तर समाधान हुन्छ । अन्य निकायका लागि पनि समस्याहरूमा हामीले समन्वय र सहयोग गरेर समाधान निकाल्छौ । यस जिल्लाका सेवा प्रवाह, विकास निर्माण, सीमा समन्वय तथा अन्तर निकाय समन्वयका विषयहरू प्रभावकारी रहन्छन् । यसमा म विश्वस्त छु ।
अन्तमा‚ रसुवाका जनताका लागि केही छन् ?
रसुवा अधिक सम्भावना भएको जिल्ला हो । सबैको समन्वयका ढोकाहरू खोज्दै जानू पर्छ । पारदर्शी‚ एकता र सहकार्यमा सबैले ध्यान दिनुपर्छ । रसुवामा गुणस्तरीय शिक्षा, स्वास्थ्य सेवा र सहज पहुँचका लागि थप काम गर्नुपर्छ । जहाँसम्म सेवा प्रवाहको कुरा छ‚ म रसुवावासी नागरिकहरूलाई जिम्मेवार अधिकारीहरू समक्ष प्रश्न सोध्न र गुनासो गर्ने बानीको विकास गर्न समेत अनुरोध गर्छु ।
