‘नर्सिङ र केयरगिभरलाई सँगै राखेर हेरिनु हुँदैन’

शन्तबहादुर तामाङ
शन्तबहादुर तामाङ संवाददाता
714 Shares
काठमाडौं‌

युरोप, अमेरिका तथा इजरायलमा बढ्दो नेपाली केयरगिभरको मागलाई मध्यनजर गर्दै काठमाडौँ मै अन्तर्राष्ट्रियकरण पाठ्यक्रम तथा प्रविधियुक्त एकेडेमी सञ्चालनमा आएको छ ।

एक दशक भन्दाबढी समय इजरायलमा केयरगिभरको काम गरेका अनुभवी प्रशिक्षकहरूबाट अध्ययन अध्यापन गराउने गरी काठमाडौँमा ‘केयरगिभर एकेडेमिया’ सञ्चालनमा आएको हो । केयरगिभर एकेडेमियाले शनिवार एक समारोहबिच आफ्नो कक्षा सञ्चालनमा ल्याएको छ । कक्षा शुभारम्भअघि समाजवादी ट्रेड युनियन महासङ्घका अध्यक्ष एवं संयुक्त ट्रेड युनियन समन्वय केन्द्र (जेटीयुसीसी)का महासचिव नवराज दाहाल, केयरभिगर एकेडेमियाका व्यवस्थापक हिरा लामा, विशेष अतिथि नारायण निरौला, वैदेशिक रोजगार उद्धार श्रमिक सङ्घ नेपालका अध्यक्ष पासाङ दोर्जे लामा (विशाल), आइल्स प्रशिक्षक ट्रेनजेम्स, चाँदनी म्यानेजमेन्ट सर्भिसका सञ्चालक श्याम गुरुङलगायतले संयुक्त रूपमा ‘केयरगिभर एकेडेमिया’ उद्घाटन गरे ।

नेपाल सरकार श्रम, रोजगार तथा सामाजिक सुरक्षा मन्त्रालय अन्तर्गतको वैदेशिक रोजगार विभागबाट अनुमति प्राप्त एवं व्यावसायिक सीप तथा तालिम परिषद् (सीटीईभीटी)को सम्बन्धन प्राप्त केयरगिभर एकेडेमियाले डाइमेन्सिया केयर, पार्किन्सन्स केयर, अष्टिओप्रोसिस केयर, पालियाटिभ केयर, जेरियाट्रिक केयर, हस्पिक केयर, अटिजम केयर, चाइल्ड केयर, सामान्य केयरलगायतका कोर्सहरू सञ्चालन गर्ने मुख्य प्रशिक्षक किरण लामाले बताए ।

उनले प्रशिक्षार्थीहरूलाई कार्यक्षेत्रमा बहन गर्नुपर्ने जिम्मेवारी र आइपर्ने चुनौतीबारे प्रशिक्षण दिए भने बिरामीलाई बेडबाट ह्वीलचियरमा कसरी राख्ने भन्नेबारे प्रयोगात्मक ‘डेमो’समेत देखाए ।

हिब्रुलगायत विभिन्न भाषा प्रशिक्षक कमला भण्डारीले प्रशिक्षार्थीहरूलाई आफूहरूले कार्यक्षेत्रमा भोगेका भोगाई र अनुभव तथा भाषाका कारण उत्पन्न समस्याबारे जानकारी दिइन् । लामो समय केयरगिभरको कार्य अनुभव लिएकी कमला राईले कार्यक्षेत्रमा हुने चुनौतीबारे प्रशिक्षार्थीसँग अनुभव साटिन् ।
अहिले युके, अस्ट्रेलिया, क्यानडा, अमेरिका, न्युजिल्याण्ड, जर्मनी, डेनमार्क, जापानलगायत इजरायल आदि मुलुकमा नेपाली केयरगिभरको माग बढ्दो छ । त्यसतर्फ जाने नेपालीहरूको आकर्षण समेत बढ्दै गएको छ । केयरगिभर एकेडेमियाले ती देशको आवश्यकता र स्किल मेन्टेन गर्ने गरी कोर्स निर्माण गरेर अध्यापन गराइरहेको छ ।
केयरगिभर एकेडेमियाले केयरगिभरबारेको आम बुझाइलाई चिर्ने प्रयत्न समेत गरेको छ । आम रूपमा केयरगिभरलाई नर्सिङसँग प्रत्यक्ष जोडेर हेर्ने गरिन्छ भने केयरगिभरको तालिम प्रदायक संस्थाहरुले अहिलेसम्म नर्समार्फत नै यस सम्बन्धी तालिम तथा सीप प्रदान गरिरहेका छन् । तर, केयरगिभर एकेडेमियाले केयरगिभर र नर्सिङको आपसमा सम्बन्ध भए पनि यी दुबैलाई सँगै राखेर हेर्न नहुने दृष्टिकोण राखेर कार्यक्षेत्रमैत्री पाठ्यक्रम तयार पारेको छ ।

नर्सले चिकित्सकको सल्लाह बमोजिम बिरामीको हेरचाह गर्दछन् भने केयरगिभरले त्यस बाहेकका सबै कामहरूको जिम्मेवारी बहन गर्नु पर्ने भएका कारण यसलाई नर्सिङसँगै राखेर हेर्न नहुने केयरगिभर एकेडेमियाको स्पष्ट धारणा छ ।

हिँड्न नसक्ने बिरामीलाई बेडबाट ह्वीलचियरमा राखेर दाँत माझ्नेदेखि नुहाई दिने, खाना खुवाइदिने काम मात्र नभई स्वास्थ्यका सम्बन्धमा पनि थुप्रै जिम्मेवारीहरू केयरगिभरमा निर्भर रहन्छ । केयरगिभरले आमा, बुबा, साथी सबैको भूमिका निर्वाह गर्नुपर्ने भएका कारण एउटा बिरामीको सिङ्गो जीवन केयरगिभरको हातमा हुने मुख्य प्रशिक्षक लामा बताउँछन् ।

उनले भने, ‘कार्यक्षेत्रमा भइपरी आउने विभिन्न समस्याहरूबारे छलफल गर्दै हामी प्रयोगात्मक प्रशिक्षणलाई बढी जोड दिन्छौँ । जसले केयरगिभरको रूपमा काम गर्न जाने इच्छुक विद्यार्थीलाई मानसिक, शारिरीक र मनोवैज्ञानिक रूपमा कन्फिडेन्स गराउँछ । पहिलो कुरा केयरगिभर नै स्वस्थ तथा स्वच्छ हुन जरुरी रहेकाले हामी व्यवहारिक एवं प्रयोगात्मक प्रशिक्षणमा बढी मेहनत गर्छौँ ।’

लामाका अनुसार विगतका प्रशिक्षणले निम्त्याएका अफ्ठयारो समेतलाई ध्यानमा राखेर सम्बन्धित देशको कोर्स तथा त्यहीँ कार्यरत एवं अनुभवीहरूसँग परामर्श गरेर बनाइएको पाठ्यक्रम तथा प्रयोगात्मक सिकाइ पद्धति केयरगिभर एकेडेमियाको मुख्य विशेषता हो ।

अहिले युरोप, अमेरिकालगायत आकर्षक गन्तव्य मुलुकहरूले नेपाली केयरगिभर रुचाएका छन् भने सरकारले ती मुलुकहरूसँग धमाधम श्रम समझदारी अघि बढाएको छ । केयरगिभर एकेडेमिया नेल्स एकेडेमियाको सहायक कम्पनी रहेको व्यवस्थापक हिरा लामाले बताए ।

तपाईको प्रतिक्रिया