संयुक्त राष्ट्रसङ्घले सार्वजनिक जीवनका सबै पक्षमा अफगान महिलाहरूको सशक्त र सक्रिय सहभागिताको आवश्यकतामा जोड दिएको खामा प्रेसले बताएको छ । राष्ट्रसङ्घीय मानवीय मामिला समन्वय कार्यालय (ओसिएचए) का उप–संयोजक इन्द्रिका रतवाटेले लैङ्गिक समानता र अफगान महिला तथा युवतीहरूको अधिकारका लागि संयुक्त राष्ट्रसङ्घको दृढ प्रतिबद्धतामा जोड दिए ।
“राष्ट्रिय सुरक्षा परिषद्ले लैङ्गिक समानता र अफगानिस्तानमा महिला तथा युवतीहरूको अधिकार, उनीहरुका लागि सुरक्षित ठाउँको सृजना, सार्वजनिक जीवनका सबै पक्षमा उनीहरूको अर्थपूर्ण र सक्रिय सहभागिताको समर्थनमा राष्ट्रसङ्घ प्रतिबद्ध छ”, राष्ट्रसङ्घले आफ्नो प्रतिवेदनमा भनेको छ । ओसिएचएको प्रतिवेदनअनुसार अफगानिस्तानमा सहायता वितरणका लागि आवश्यक बजेटको छ प्रतिशत मात्र खर्च भएको खामा प्रेसले जनाएको छ ।
रतवाटेले अफगानिस्तानमा लैङ्गिक समानता र महिलाहरूको अधिकारका लागि राष्ट्रसङ्घको समर्थनमा जोड दिँदै बजेट कटौतीप्रति गहिरो चिन्ता व्यक्त गरे । अफगानिस्थानमा प्रभावितमध्ये ९० प्रतिशत महिला तथा बालबालिकाका लागि सुरक्षित स्थानहरूको निर्माणका लागि राष्ट्रसङ्घको विशेष ध्यान रहेको रतवाटेले बताएका छन् । उनले अफगानिस्तानमा महिलाहरूको सहयोगका सन्दर्भमा सांस्कृतिक संवेदनशीलतालाई जोड दिँदै उनीहरूका लागि निरन्तर सहयोगको आवश्यकताका लागि आह्वान गरे ।
“म अफगानिस्तान आइरहेको २० वर्षभन्दा बढी भइसक्यो ।यहाँ मेरा प्रिय साथीहरू छन् । यो देशले सधैँ मेरो हृदयमा विशेष स्थान राखेको छ । मलाई विश्वास छ कि हामी अफगानिस्तानका जनताका हकका लागि सहयोग गर्न सक्छौँ । म यस प्रयासमा पूर्णरूपमा प्रतिबद्ध छु”, रतवाटेले भने । सन् २०२१ मा तालिबानले अफगानिस्तानमा महिलाहरूका लागि शिक्षा र कामलाई निलम्बन गरेपछि निजी क्षेत्र र व्यापारमा अन्तर्राष्ट्रिय समर्थनस्वरूप राष्ट्रसङ्घको यो भनाइ आएको हो ।
