तनहुँ जिल्ला स्थायी घर भई हाल तारकेश्वर नगरपालिका वडा नम्बर १० काठमाडौँमा बसोबास गरिरहनुभएको मुना अधिकारी ढकाल २०७७ साल चैत २३ गते रसुवा जिल्ला अदालतमा श्रेस्तेदार पदमा कार्यरत हुनुहुन्छ ।
२०६६ सालमा शाखा अधिकृत पदमा निजामती सेवामा प्रवेश गरी यस भन्दा अगाडि सर्वोच्च अदालत,उच्च अदालत ,वैदेशिक रोजगार न्यायाधिकरण हुँदै जिल्ला अदालत रसुवा आइपुग्नु भएको उहाँ १५ वर्षे जागिरे जीवन बिताइसक्नुभएको छ । उहाँले कानुन विषयमा स्नातकोत्तर हासिल गर्नुभएको छ । उहाँसँग समसामयिक विषयलाई लिएर हाम्रो सम्वाददाता सरस्वती न्यौपाने ले गरेको कुराकानी :
रसुवा आउनुभन्दा अगाडि कहाँ हुनुहुन्थ्यो ? रसुवा पहिलो पटक हो कि ?
रसुवा जिल्ला अदालतमा आउनु अगाडि म सर्वोच्च अदालतमा ईजलास अधिकृत पदमा कार्यरत थिए । रसुवा चाहिँ मेरो पहिलो पटक हो ।
अरू जिल्ला भन्दा यस जिल्लामा काम गर्दा तपाईँलाई कस्तो लाग्यो तपाईँको अनुभव वताईदिनुहोस न ?
जागिरको सिलसिलामा काठमाडौँ उपत्यका भन्दा बाहिरी जिल्लाको अनुभव खासै छैन । यस जिल्लामा विगत ३ वर्ष लामो कार्य सम्पादनको अनुभवको आधारमा भन्नुपर्दा अदालती काम कारबाहीलाई छिटो र पहुँचयोग्य बनाउनका लागि सरोकारवाला निकायहरूका साथै मुद्दाका पक्षहरूबाट एकदमै राम्रो सहकार्य समन्वय भइरहेको छ । अदालतले बनाएको वार्षिक कार्य योजनाको लक्ष्य हासिल गर्नमा सफल भएको र रसुवावासीले सहज रूपमा न्याय प्राप्त गरी अदालतप्रति आस्था र विश्वास बढ्दै गएको अनुभव गरेको छु ।
रसुवामा प्राय जस्तो कस्ता प्रकृतिको घटनाहरू आउने गर्दछन् ?
मुद्दा दायरीको आधारमा जिल्ला अदालतमा देवानी प्रकृतिका विवादहरू त्यसमा पनि विशेष गरी सम्बन्ध विच्छेदका मुद्दाहरू बढी दायर हुने गर्दछन् । कुल मुद्दा दायरीको करिब २० प्रतिशत मात्र फौजदारी प्रकृतिका मुद्दाहरू दायर हुने गरेको अवस्था छ ।
तपाईँ यस जिल्लामा कार्यरत रहेको ३ वर्ष भयो र यो ३ वर्ष यता रसुवा अदालतबाट कति मुद्दाहरू फर्छ्यौट गर्नुभयो ?
म यस रसुवा जिल्ला अदालतमा कार्यरत रहँदा आव ०७८/०७९ मा ५७ थान, आव०७९/०८० मा ८१ थान र आव२०८०/०८१ मा हालसम्म ७३ थान गरी जम्मा २११ थान मुद्दा फर्छ्यौट भएको तथ्याङ्कमा छ ।
स्रेस्तादारको जिम्मेवारी बहन गर्दै आफूले गरेका कामबाट तपाईँ कतिको सन्तुष्ट हुनुहुन्छ ?
व्यक्तिगत अनुभवका साथै अदालती काम कारबाहीका सम्बन्धमा आफ्ना अनुभव व्यक्त गर्ने अवसर उपलब्ध गराइदिनुभएकोमा पत्रकार ज्युलाई धन्यवाद दिन चाहन्छु । यसका साथै अदालती गतिविधिका सम्बन्धमा स्थानीय तथा राष्ट्रिय संचामाध्यमबाट अदालती गतिविधिका सम्बन्धमा सकारात्मक सूचनाहरू प्रवाह गरी अदालतप्रति रसुवावासीको आस्था र विश्वास बढाउने कार्यमा सधैँ साथ सहयोग गर्नुहुने यस जिल्लाका वरिष्ठ पत्रकार ज्ञानेन्द्र न्यौपानेलाई समेत विशेष धन्यवाद दिन चाहन्छु ।
