राष्ट्रिय समाचार समिति ९रासस० का कार्यकारी अध्यक्ष धर्मेन्द्र झाले वर्तमान पत्रकारिताले समाजको वास्तविक यथार्थ चित्रण गर्न नसकेको बताएको छ ।
झापाको कनकाई नगरपालिकाको सुरुङ्गामा नेपाल पत्रकार महासङ्घ झापा शाखाले आज आयोजना गरेको सञ्चार नीतिसम्बन्धी छलफलमा कार्यकारी अध्यक्ष झाले समाज रुपान्तरणलाई केन्द्रमा राखेर पत्रकारिता गर्न नसक्दा समाजको यथार्थ चित्रण हुन नसकेको बताएको हो ।
उनले पत्रकारहरुलाई सत्य, तथ्य बुझेर सही सूचना सम्प्रेषण गर्न आग्रह गरे । “आजको पत्रकारिता लेनदेनमा गयो”, उनले भने, “यसले हाम्रो गरिमा घटाउँछ ।” कार्यकारी अध्यक्ष झाले आफ्नो क्षमता अभिवृद्धि गरेर अघि बढ्नुको विकल्प नभएको बताए । ” सरकारले पत्रकारितासम्बन्धी ऐन, कानुन समयमै बनाउन नसक्दा पत्रकार र सञ्चार क्षेत्रमा समस्या आउने गरेको उनले बताए ।
पत्रकार महासङ्घका वरिष्ठ उपाध्यक्ष रमेश विष्टले पत्रकारिताको साख जोगाउन कठिन भएको बताए । उनले विकाउ पत्रकारिताभन्दा पनि टिकाउ पत्रकारितालाई प्राथमिकतामा राखेर काम गर्न पत्रकारहरुलाई आग्रह गरे ।
नेपाल पत्रकार महासङ्घका पूर्वअध्यक्ष शिव गाउँलेले सहजीकरण गर्नुभएको उक्त कार्यक्रममा कोशी प्रदेशका आर्थिक मामिला तथा योजनामन्त्री लीलाबल्लभ अधिकारी, सूचना तथा प्रसारण विभागका निर्देशक भरत गौतम, कनकाई नगरपालिकाका प्रमुख राजेन्द्रकुमार पोखरेललगायत वक्ताले नेपाल पत्रकारिताका विविध आयामबारे चर्चा गरिएको थियो । कार्यक्रममा कोशी प्रदेशका १४ जिल्लाका पत्रकारको सहभागिता छ ।
