चर्चित गायक एवं सङ्गीतकार विश्व दोङ र ल्हास्सो म्युजिकल ब्यान्डको लाइभ साङ्गीतिक कार्यक्रम ऐतिहासिक दोस्रो डम्फु साँझ २०८१ आयोजना गर्ने भएको छ ।
डम्फु साँझ प्रालिद्वारा यही असोज १२ गते लिक्विड लाउन्ज एन्ड बारमा साँझको आयोजना गरिने पत्रकार सम्मेलनमार्फत जानकारी दिएका हुन् ।
डम्फुको तालमा रहेको गीतसङ्गीत तथा कला संस्कृतिलाई संसारभरि फैलाउनु, तामाङ सभ्यताको विकास गरी यसको महत्त्व दर्साउनु, आफ्नो अस्तित्व र पहिचान कायम राख्न टेवा पुगोस् अनि नेपाल राष्ट्रको राष्ट्रिय पहिचान संसारभरि छुट्टै कायम रहोस् भन्ने नै यस कार्यक्रमको प्रमुख उद्देश्य रहेको गायक दोङले जानकारी दिए ।
डम्फु साँझमा गायक दोङको चर्चित गीतहरू गुन्जने छन् । जसमा उनका अहिलेसम्म चर्चित भएका सेलो गीतहरूले दर्शकलाई मनोरञ्जन दिनेछन् ।
कार्यक्रमले तामाङ कला, संस्कृति, र परम्परालाई मात्र जीवन्त राख्ने नभई नयाँ पुस्तालाई समेत संस्कृतिप्रति प्रेरित गर्ने अवसर प्रदान गरिने गायक दोङले बताए ।
कार्यक्रमको प्रमुख आकर्षणका रूपमा लोकप्रिय गायक सुमिना लो र सुनिता गोलेको प्रस्तुति रहनेछन् । कलाकारहरूले तामाङ समुदायको सांस्कृतिक पहिचान झल्काउने गीतहरू प्रस्तुत गर्दै दर्शकलाई मनोरञ्जन दिनेछन् । गायिकाहरूले तामाङ समुदायको लोक सङ्गीतलाई नयाँ रूप दिएर प्रस्तुत गर्दै आएको इतिहास छ। सुमिना लोले आफ्नो मौलिक शैलीमा पुराना तामाङ गीतहरूलाई आधुनिक लयमा प्रस्तुत गरेकी छन् भने सुनिता गोलेले आफ्नो आवाजमार्फत तामाङ सभ्यताको सौन्दर्यलाई प्रस्तुत गर्ने प्रयास गर्दै आएकी छन्।
तामाङ समुदायको परम्परागत बाजा डम्फुलाई केन्द्रमा राखेर आयोजना गरिने यो साँझले हरेक वर्ष तामाङ समुदायको संस्कृति र परम्परालाई जीवित राख्न महत्त्वपूर्ण योगदान पुर्याउँदै आएको छ।
कार्यक्रमले तामाङ समुदायको एकता, संस्कृति, र परम्परालाई संरक्षण गर्ने दिशामा महत्त्वपूर्ण भूमिका खेलेको आयोजक संस्थाले जनाएको छ।
कार्यक्रमको औपचारिक उद्घाटन बागमती प्रदेशका मुख्यमन्त्री बहादुरसिंह लामाले गर्नेछन्। यससँगै उपस्थित दर्शकहरूले तामाङ सभ्यता र सांस्कृतिक धरोहरबारे गहिरो जानकारी प्राप्त गर्ने अवसर पाउनेछन्। आयोजकहरूले यो कार्यक्रमले तामाङ समुदायको एकताको भावना सुदृढ गर्ने र सांस्कृतिक धरोहरको प्रवर्द्धनमा ठुलो योगदान पुर्याउने आशा राखेका छन्।
यस वर्षको डम्फु साँझमा तामाङ समुदायको परम्परागत बाजा डम्फुलाई विशेष महत्त्व दिइनेछ। कार्यक्रमको थालनी डम्फु र तामाङ लोक गीतहरूबाट हुनेछ, जसले तामाङ संस्कृतिको मौलिकता र विविधतालाई झल्काउनेछ। आयोजकहरूले तामाङ समुदायको जीवनशैली, भाषा, कला, र परम्परालाई विश्वभरका दर्शकमाझ पुर्याउन यो साँझ महत्त्वपूर्ण माध्यम बन्ने विश्वास व्यक्त गरेका छन्।
तामाङ समुदायभित्र मात्र नभई अन्य समुदायका व्यक्तिहरूलाई समेत आकर्षित गर्न सक्ने गरी आयोजना गरिने यो साँझले विभिन्न जातीय समुदायबिच आपसी सद्भाव र भाइचारा प्रवर्द्धन गर्न समेत मद्दत पुर्याउने विश्वास आयोजकहरूको छ।
कार्यक्रमको लागि रु १ हजारको टिकट दर तोकिएको छ ।
