काठमाडौँमा ‘क्यानभासमा जिरी’ नामक कला प्रदर्शनी गरिने भएको छ।
दोलखाको रमणीय उपत्यका जिरीको पर्यटन प्रवर्द्धन गर्ने उद्देश्यले भदौ २८ गते शुक्रवारदेखि आइतबारसम्म प्रदर्शन हुनेछ ।
नयाँ बानेश्वरस्थित उमोजा क्याफेमा ‘पर्यटन प्रवर्द्धन मञ्च, नेपाल’ ले आयोजना गर्न लागेको हो।
केही समय पहिले दोस्रो जिरी महोत्सवका अवसरमा ६ जना कलाकारले बनाएका ३२ वटा चित्र प्रदर्शनीमा राखिने संयोजक लिलाराम खड्काले जानकारी दिए ।
कलाकारहरू केशवराज खनाल, किशोर रानाभाट, लिलाधर केसी, मोहन शिवाकोटी, प्रकाश मिजार र शिव शिर्पालीले एक्रेलिक र जलरङ प्रयोग गरी बनाएका चित्र प्रदर्शनीमा राख्न लागिएको हो।
खड्काले भने, ‘कला मार्फत जिरीको प्रकृति, संस्कृति र जीवनशैली पस्कने प्रयास गरेका हौँ ।’
उनले यसले जिरीको पर्यटन विकासमा ठुलो टेवा पुर्याउने बताए ।
प्रदर्शनी भदौ २८ देखि भदौ ३० गतेसम्म तीन दिन चल्नेछ।
