नेपालमा कृषि क्षेत्रलाई सम्मानजनक पेशाको रूपमा स्थापित गर्न र कृषि क्रान्ति ल्याउने उद्देश्यले गत सोमबार राजधानी काठमाडौंमा एक राष्ट्रिय कार्यशाला आयोजना गरिएको थियो।
बिपी चिन्तन प्रतिष्ठान नेपाल केन्द्रिय समितिले आयोजना गरेको यस कार्यशालामा ‘नेपालमा कृषि क्रान्ति : चुनौती र सम्भावना’ विषयमा गहन छलफल भएको थियो। कार्यक्रमका सहभागीहरुले कृषिलाई पहिलो सम्मानजनक पेशा बनाउनुपर्नेमा जोड दिएका थिए।
कार्यक्रमको उद्घाटन गर्दै कृषि विकास तथा पशुपंक्षी मन्त्री रामनाथ अधिकारीले छिटै कृषिमा लगानी वर्ष घोषणा हुने जानकारी दिए। उनले कृषि ऐन ल्याउने तयारी अन्तिम चरणमा पुगेको र कृषि नीति २०६१ लाई परिमार्जन गर्ने तयारी रहेको पनि बताए।
आयोजक संस्थाका अध्यक्ष हरिबोल भटराईले नेपालको अर्थतन्त्र परम्परागत रूपमा कृषिमा निर्भर भएता पनि कृषिलाई सरकारले पर्याप्त महत्व दिँदै आएको छैन भन्दै यस क्षेत्रमा ठूलो सुधार आवश्यक रहेको बताए। कार्यक्रमका अन्य वक्ताहरुले नेपाली समाजमा कृषि पेशाप्रति भएको नकारात्मक धारणालाई चुनौती दिँदै किसानी पेशालाई सम्मानजनक बनाउनुपर्ने माग गरे। उनीहरुले समाजमा किसानलाई गाली गर्दा पनि “भौलिपर्सि हलो जोतेर खाने भइस्” भन्ने प्रचलनलाई किसानी पेशाप्रति भएको असम्मानको उदाहरणको रूपमा उल्लेख गरे।
कार्यक्रममा सहभागीहरुले किसानलाई सम्मान गर्ने वातावरण सिर्जना गर्नुपर्ने, किसानलाई सिंहदरवारमा सहज प्रवेश, बैंकमा लाइन वस्न नपर्ने जस्ता सुविधा उपलब्ध गराउनुपर्ने र कृषि पेशालाई सम्मानजनक बनाउनुपर्ने मागहरु राखे। यसैबीच, कार्यक्रममा तीन वटा कार्यपत्रहरु प्रस्तुत गरिएका थिए जसमा नेपालमा कृषि क्षेत्रको वर्तमान अवस्था, चुनौतीहरु र सम्भावनाहरुबारे विस्तृत विश्लेषण प्रस्तुत गरिएको थियो।
यस कार्यशालाले नेपालमा कृषि क्षेत्रलाई अझ बलियो बनाउने र कृषि क्रान्ति ल्याउने दिशामा ठूलो भूमिका खेल्ने अपेक्षा गरिएको छ।
