एनआरएनए क्रोएसियाका सल्लाहकार एवं युवा समाजसेवी दावा लामाले नेपाली दूतावास राख्न माग गरेको छ । सल्लाहकार लामाले श्रम, रोजगार तथा सामाजिक सुरक्षा मन्त्री शरदसिंह भण्डारीसँग भेट गरेर दूतावासको माग गरेको हो ।
हाल नेपाल रहेका एनआरएन क्रोएसियाका सल्लाहकार लामाले मन्त्री भण्डारीसँगको भेटमा क्रोएसियामा रहेका नेपालीहरुको तलब/भत्ता, कामको सुरक्षा, कानुनी समस्या र अन्य प्रशासनिक कठिनाइहरूका बारेमा छलफल गरेका हुन् । उनका अनुसार नेपाली दूतावास स्थापनाले नेपाल-क्रोएसिया श्रम सम्झौता, प्रशासनिक लगायत अन्य विषयलाई समेत सजिलो हुनेछन् ।
सल्लाहकार लामाका अनुसार हाल क्रोएसियामा करिब ३० हजारभन्दा धेरै नेपालीहरु कार्यरत छन् । क्रोएसियामा नेपाली दूतावास नहुदा नेपालीहरू कानुनी तथा प्रशासनिक सेवाका लागि अन्य देश जानुपर्ने बाध्यता रहेको सल्लाहकार लामाको भनाई छ ।
गतवर्षदेखिनै दूतावासको आवश्यकता महसुस गरेर एनआरएन क्रोएसियाले आवाज उठाउदै आएको छ । त्यसै क्रममा यसअघि समेत सल्लाहकार लामाले प्रधानमन्त्री, गृहमन्त्री लगायतलाई भेट गरेर नेपाली दूतावास स्थापना गर्न अनुरोध गरेका थिए ।
मन्त्री भण्डारीले नेपाली श्रमिकहरूको समस्याप्रति सकारात्मक धारणा राखेको सल्लाहकार लामाले बताए । उनका अनुसार मन्त्री भण्डारीले दूतावासका स्थापनाका लागि आवश्यक कदम चाल्ने प्रतिबद्धता गरे ।
एनआरएन क्रोएसियाका सल्लाहकार लामाले नेपाल सरकारले दूतावास स्थापना गरेमा नेपालीलाई सहज सेवा उपलब्ध हुने बताए । उनका अनुसार दूतावास स्थापनाले नेपाल-क्रोएसिया सम्बन्ध थप सुदृढ हुनेछन् ।
