‘रवीन्द्रले जस्तै काम गरे, सबैको मन जिते, हामी तिम्रै साथमा छौँ,’ विद्या भट्टराई अधिकारीलाई एक ज्येष्ठ नागरिकले दिएको आशीर्वाद हो, यो ।
पोखरा–२१ र १७ को सिमानामा रहेको फुस्रेखोला पुलको मुखमा मंगलबार स्वागतका लागि उपस्थित जनताको बीचबाट ९३ वर्षीय छवि पहारीले नेकपाका उम्मेदवार विद्याको शिरमा हात राखेर भने, “रवीन्द्र र जनताको सपना पूरा गर्ने जिम्मेवारी अब तिमीमा आएको छ ।”
पोखरा–२१ लगायतले समग्र पोखराको विकास निर्माणमा रवीन्द्रको महत्वपूर्ण योगदानको स्मरण गर्दै स्थानीयवासी हरि अधिकारीले रवीन्द्रकै कारण यस ठाउँमा विकास सम्भव भएको सुनाए । कम्युनिष्टले बीउ रोपेर मलजल गरेको पोखराको ऐतिहासिक एवं रमणीय स्थान निर्मल पोखरी र कृष्ती नाच्नेचौरको सडक, खानेपानी, विद्युतीकरणलगायतका विकास निर्माणमा रवीन्द्रको योगदान जनताले कहिल्यै नभुल्ने उनको भनाइ थियो ।
घरदैलो कार्यक्रमपश्चात् आयोजित कोणसभालाई सम्बोधन गर्दै उम्मेदवार विद्या भट्टराई अधिकारीले जित हासिल गरेपछि जनचाहनालाई शिरोपर गरी अघि बढ्ने प्रतिबद्धता व्यक्त गरिन् ।परिवार र पार्टीले दिएको ज्ञान अँगालेर जनताकै हितमा जीवन समर्पण गर्ने बताउँदै उनले भनिन् , “जनता र राष्ट्रभन्दा माथि कोही छैन, जसको निम्ति म कुनै पनि चुनौतीको सामना गर्न तयार छु ।”
स्व: रवीन्द्र अधिकारीले देखेका अधुरा सपना पूरा गर्न आफूलाई पार्टीले उम्मेदवार बनाएको बताउँदै उनले त्यसका लागि सबै जनताको सहयोग आवश्यक रहेको उल्लेख गरिन् । कार्यक्रममा नेकपा कास्कीका अध्यक्ष तथा प्रदेशसभा सदस्य कृष्ण थापाले नेतृत्व र कार्यकर्तातह सङ्गठित भएर लाग्न सके मात्र जित सुनिश्चित हुने विश्वास व्यक्त गर्दै योग्य, सक्षम, युवा र प्राज्ञिक व्यक्तिलाई नेकपाले उम्मेदवार बनाएको बताए ।
प्रदेशसभा सदस्य तथा युवानेता राजीव पहारीले मुलुकका तीनै तहका सरकार ‘समृद्ध नेपाल सुखी नेपाली’ अभियानमा जुटेको उल्लेख गर्दै सरकारले गरेको उपलब्धिलाई जनतासमक्ष पुर्याउनुपर्ने आवश्यकता औँल्याए । पोखरा महानगरका अध्यक्ष दीपक पौडेल, पोखरा–२१ का वडाध्यक्ष खगराज आचार्य, नेकपा पोखरा–२१ का अध्यक्ष कृष्ण थापामगरलगायतका नेता एवं कार्यकर्ता जनताको घरदैलोमा पुगेर भोट माग्न व्यस्त थियो ।
तत्कालीन संस्कृति, पर्यटन तथा नागरिक उड्डयनमन्त्री रवीन्द्र अधिकारीको हेलिकोप्टर दुर्घटनामा परी निधन भएसँगै उपनिर्वाचन हुन लागेको यो मुलुकको एक मात्र प्रतिनिधिसभा सदस्य निर्वाचन क्षेत्र हो । नेकपाले उम्मेदवारी दर्तासँगै निर्वाचन क्षेत्रअन्तर्गत पोखराका ११ वटै वडामा निर्वाचन सम्पर्क कार्यालयसमेत स्थापना गरी नियमित सञ्चालन गर्दै प्रचारप्रसारलाई तीव्रता दिँदै आएको छ ।
