साउदी अरेबियामा नेपाली दूतावासले भिजिट नेपाल २०२०लाई बृहत प्रचारप्रसार गर्न शुक्रबार अन्तरक्रिया कार्यक्रम गरेको छ ।
रियादस्थित दूतावासको प्राङ्गणमा गरेको अन्तरक्रिया कार्यक्रममा झण्डै तीन दर्जन सङ्घसंस्थाका साथै विविध पेशामा कार्यरत नेपालीहरुको बाक्लो उपस्थितिरहेका थिए ।
अन्तरक्रियामा साउदीका लागि नेपाली राजदूत प्रा.डा. महेन्द्र प्रसाद सिंह राजपुतले नेपाल सरकारले लिएको लक्ष्य तथा नेपाल भ्रमण वर्ष २०२० को बारे सरकारी स्तरबाट भएको प्रयासहरुका बारे प्रकाश पारेका थिए । साउदी अरेबिया सरकारको पर्यटन, प्रवर्द्धन मन्त्रालयबाट प्रचारप्रसारका लागि सहज वातावरण बनाउन उक्त मन्त्रालयबाट स्वीकृति लिन पहल भइरहेको राजदूत सिंहले जानकारी दिए ।
राजदूत सिंहले साउदीमा रहेका नेपाली समुदाय तथा सङ्घसस्थाहरुले भिजिट नेपाल २०२०लाई सफल बनाउन आफ्नो तवरबाट सहयोग गरी प्रचारप्रसार गर्न आग्रह गरे । नेपाल पर्यटन बोर्डका अनुसार प्रत्येक वर्ष नेपालमा विभिन्न मुलुकका १२ लाख पर्यटकहरू भित्रिरहेको तथ्याङ्क रहेको छ, राजदूत सिंहले भने, यसवर्ष थप ८ लाख भित्र्याउदा २० लाख पर्यटकहरू नेपाल आउने छन् ।’ राजदूत सिंहले अर्को छलफल तथा अन्तरक्रियामा सबैलाई समेट्ने गरी गर्न केही दिन भित्रै मिति तोकेर जानकारी दिने बताए ।
त्यसैगरी दूतावासका नियोग उपप्रमुख दिलीपकुमार पौडेलले साउदी अरेबिया सरकारको सम्बन्धित निकायहरुसँग भिजिट नेपाल २०२०का लागि भेटघाट तथा छलफल बाक्लिएको बताए । उपप्रमुख पौडेलले हालसम्म भिजिट नेपालका लागि साउदी सरकारसँग कानूनी प्रकृयामा रहेका जटिलताका बारेमा छलफल भइरहेको जानकारी दिए ।
साउदी अरेबियाका पत्रकारहरुका एक टोलीलाई नेपाल पठाई अरेबियन छापा पत्रीका तथा टेलिभिजनमा देखाउने प्रयास भइरहेको उपप्रमुख पौडेलले बताए । दूतावासले भिजिट नेपाल २०२० को प्रचारप्रसारका लागि अरेबियन भाषा र अङ्ग्रेजी भाषामा डकुमेण्ट्रीहरू बनाउँदै छ, उपप्रमुख पौडेलले भने, तयार भएपछि सबैलाई इमेलबाट उपलब्ध गर्छौं ।
उपप्रमुख पौडेलले दूतावासले सबैलाई समान रुपले हेर्दै आएको विभेद नगरेको स्पष्ट पारे । उनले थपे, नेपाल सरकारको निर्देशिका अनुसारनै गैरआवासीय नेपाली सङ्घ (एनआरएन) दोस्रोपटक राजनीति दलका प्रवास सङ्गठन र तेस्रोपटक सामाजिक सङ्घसंस्थासँग छलफल तथा अन्तरक्रिया गरेको बताए ।
त्यसैगरी श्रम सहचारी अम्बिका प्रसाद अधिकारीले पर्यटन र पर्यटक ले नेपालको अर्थतन्त्रलाई धेरै सहयोग गर्ने बताए । उनले धेरै भन्दा धेरै नेपालमा पर्यटन भित्र्याउनको लागि प्रचारप्रसारनै मेरुदण्ड भएको औल्याए ।
नेपाली र नेपालको झल्किने सामाग्रीहरु, साउदीका विभिन्न ठाउँमा होडिङ बोर्ड बनाएर राख्ने सके सरकारको लक्ष्य वर्ष नसकिदै पुरा हुने श्रम सहचारी अधिकारीले बताए । आआफ्ना तरिकाबाट नेपालको बारेमा लेखिएका वा देखाएका सामाग्रीहरु उपलब्ध गरि प्रचारप्रसारमा सहयोग गर्ने आग्रह गरे ।
श्रम सहचारी अधिकारिले दूतावासले क्रमिक रुपमा साउदी अरेबियामा रहेका सामाजिक संघसंस्थाहरुसँग भेटघाट तथा अन्तरक्रिया गरेको बताए । यसअघि `गैरआवासीय नेपाली संघ(एनआरएन) र राजनीति दलका प्रवास संगठन´ सँग भिजिट नेपाल वर्षका लागि छुट्टाछुट्टै अन्तरक्रिया गरिसकेका छौंँ, अधिकारीले भने ।
काभ्रे सेवा समाजका अध्यक्ष तथा नेपाल तामाङ घेदुङका क्षेत्रीय संरक्षक जेन लामाले दूतावासले अन्तरक्रिया गरि भिजिट नेपाललाई व्यापक बनाउनेतर्फ लागेकोमा धन्यवाद दिए । अध्यक्ष लामाले दूतावासले छुट्टाछुट्टै अन्तरक्रिया गर्नु भनेको आफुले विभेद गरेको ठानेको बताए । जेजस्तो भएपनि हामी सबै नेपाली हो,`कसैले सुन र कसैलाई पित्तल ठान्छन् भने यसले गलत सन्देश जान्छ´, लामाले भने ।
