धनकुटा पाख्रिबास नगरपालिका-४ नेकपाका वडा कमिटी धनकुटाले बुधबार एक कार्यक्रमका बीच पाटीका अग्रजहरुलाई सम्मान गरेको छ ।
वडा नं.४,का नेकपा अध्यक्ष मदन राइको अध्यक्षता तथा सङ्घीय सभा सदस्य एवम नेकपा धनकुटाका अध्यक्ष राजेन्द्र कुमार राइको प्रमुख आतिथ्यतामा सम्पन्न कार्यक्रममा सोही वडाका नेकपाका एक दर्जन अग्रजहरुलाई सम्मानपत्र र दोसल्ला ओढाएर सम्मान गरिएको हो ।
सम्मान कार्यक्रममा प्रमुख अतिथि राइले कम्युनिष्ट पार्टीको नीति, सिद्धान्त र विचार अनुसार नै अग्रजहरुलाई सम्मान गर्दै वहाँहरुले दिएको जिम्मेवारी पुरा गर्नुपर्ने बताए । पाख्रिबास नगरपालिकाले विकास निर्माणका कामलाई तीब्र रुपमा अगाडि बढाइरहेकोमा खुशी व्यक्त गरे । निरन्तर नगर विकासका लागि यसरी नै लागिपरे समृद्धि खोज्न धेरै टाढा जान नपर्ने उनको भनाइ थियो ।
त्यसैगरी नेकपा प्रचारप्रसार बिभाग धनकुटाका अध्यक्ष अर्जुन राइले नीतिनिर्माण विकास तथा समृद्ध नेपाल नेकपाले मात्र बनाउन सक्ने दाबी गरे। उनले थपे- कहिलेकाही काम गर्ने क्रममा कमीकमजोरी हुनसक्ने भएकाले पार्टी र जनप्रतिनिधि मिलेर सुधार गर्न आवश्यक रहेकाले पार्टीले सचेत गराउनुपर्नेछ ।
कार्यक्रममा पूर्व शिक्षामन्त्री तथा नेकपा प्रदेश नम्बर १ कि सदस्य धनमाया विश्वकर्मा, सचिवालय सदस्य तारा तितुङ, पाख्रीबास इञ्चार्ज नेत्र भण्डारी लगायतले सम्मानितहरुलाई बधाई दिएका थिए ।
