काठमाडौँका यादवले जिते बन्दीपुर दौडको उपाधि

सैलुङअनलाइन
सैलुङअनलाइन संवाददाता
तनहुँ
तस्बिर : सानेबहादुर नेपाली / रासस

तनहुँको बन्दीपुर गाउँपालिकाले बुधबार आयोजना गरेको दौड प्रतियोगिताको उपाधि काठमाडौँका अजितकुमार यादवले जितेको छ । बन्दीपुरको पर्यटन प्रवर्द्धन गर्ने उद्देश्यसहित आयोजना गरिएको प्रतियोगितामा खुलातर्फको उपाधि यादवले जितेको हो ।

बन्दीपुरको डुम्रेबजारदेखि गाउँपालिकाको कार्यालयसम्मको आठ किमी दूरी ३८ मिनेट ५३ सेकेण्डमा पार गर्दै यादवले उपाधि जितेको हो । प्रतियोगितामा ओखलढुंगाका अनिल कार्की द्वितीय भएको छ । उनले उक्त दूरी ३९ मिनेट १६ सेकेण्डमा पूरा गरे । प्रतियोगितामा प्रथम र द्वितीय हुने धावकले क्रमशः ३० हजार र १५ हजार रुपैयाँ प्राप्त गरे ।

आन्तरिकतर्फको दौडमा बन्दीपुर–१ निवासी चन्द्रकुमार सुनार प्रथम र वडा नं २ निवासी रविन गुरुङ द्वितीय भए । उनीहरुले क्रमशः उक्त दूरी ४४ मिनेट ५१ सेकेण्ड र ४६ मिनेट ३७ सेकेण्डमा पूरा गरे । प्रतियोगितामा खुल्ला र आन्तरिक गरी ३० धावकको सहभागिता रहेको थियो । विजेताहरुलाई गण्डकी प्रदेशका उद्योग, पर्यटन, वन तथा वातावरणमन्त्री विकास लम्साल र गाउँपालिकाका अध्यक्ष पूर्णसिं थापाले पुरस्कार वितरण गरे ।

सो अवसरमा मन्त्री लम्सालले खेलकुदका माध्यमबाट पर्यटन प्रवर्द्धनमा महत्वपूर्ण योगदान पुग्ने बताए । पर्यटनबाट समृद्धि सम्भव रहेको चर्चा गर्दै उनले पर्यटकीय क्षेत्रको विकासका लागि सरकारले सहयोग गर्ने बताए । नेपाल भ्रमण वर्ष २०२० को अवसर पारेर बन्दीपुरको पर्यटन प्रवर्द्धन गर्ने उद्देश्यसहित दौड आयोजना गरिएको गाउँपालिकाका अध्यक्ष थापाले जानकारी दिए ।

गाउँपालिकाले सोही अवसरमा एकल पुरुषलाई सिरकसमेत वितरण गरेको छ । गतवर्ष एकल महिलालाई सिरक वितरण गरेको गाउँपालिकाले यो पटक ७० वर्ष उमेर कटेका ६०० एकल पुरुषलाई सिरक वितरण गरेको हो । बन्दीपुरलाई पर्यटनका माध्यमबाट परिचित गराउन गाउँपालिकाले विभिन्न कार्यक्रम आयोजना गरिरहेको छ । गाउँपालिकाले गतवर्ष वडा नं ४ विमलनगरस्थित सिद्धगुफाभित्र टेवलटेनिस प्रतियोगिता र कविता वाचन प्रतियोगिता सम्पन्न गरेको थियो ।

तपाईको प्रतिक्रिया