कोरोना भाइरसबाट नआत्तिन मुख्यमन्त्री पौडेलको आग्रह

सैलुङअनलाइन
सैलुङअनलाइन संवाददाता
हेटौंडा, मकवानपुर
तस्वीर फाइल

वागती प्रदेशका मुख्यमन्त्री डोरमणि पौडेलले कोरोना भाइरस (कोभिड–१९) बाट सर्वसाधारण नागरिकलाई नआत्तिन आग्रह गरेको छ । उनले संघीय स्वास्थ्य तथा जनसंख्या मन्त्रालयद्वारा कोरोना भाइरसको नियन्त्रणका लागि प्रदेश सरकारले अपनाउनुपर्ने मापदण्डको आज समीक्षा गर्न बसेको संयुक्त बैठकलाई उक्त निर्देशन दिएको हो ।

उनले प्रदेश सरकारले संघीय सरकार र स्थानीय निकायबीच समन्वय तथा सहकार्य गरी भाइरस नियन्त्रणका लागि अपनाउनुपर्ने मापदण्डलाई कार्यान्वयन गर्न तत्पर हुनुपर्ने बताए । उनले सञ्चारकर्मीले जनताप्रति उत्तरदायित्व बहन गर्दै कोरोना भाइरस प्रभावितको समाचार सम्प्रेषण गर्दा सबै नागरिकलाई भयभित र डरत्रासबाट मुक्त तुल्याई तत्काल बिरामीलाई असहज महसुस भए स्वास्थ्य उपचार संस्थामा जान प्रेरित गर्नुपर्ने बताए ।

सो अवसरमा सामाजिक विकासमन्त्री युवराज दुलालले प्रदेश सरकारले १३ जिल्लामा आपतकालीन स्वास्थ्य उपचारका लागि ५० श्ययाको छुट्टाछुट्टै उपचार कक्षको स्थापना गर्ने र बिरामीको अवस्थालाई सामान्वयरुपमा राख्दै तत्काल हेल्थ डेस्कमा सम्पर्कमा रहन स्वास्थ्यकर्मी परिचालन गरिएको उल्लेख गरे ।

उनले सर्वसाधारणलाई स्थानीय निकाय र प्रदेश सरकारले समन्वय गरेर जनचेतनामार्फत घरदैलोमा सरसफाइ गर्ने तथा सम्बन्धित परिवारले प्रत्यक्ष पशुपक्षीको सम्पर्कमा नरहने र साबुन पानीले नियमित हात धुने व्यावहारिक ज्ञान दिन सकेको खण्डमा भाइरस रोगको प्रकोप बढ्न नसक्ने विश्वास व्यक्त गरे ।

स्वास्थ्य तथा जनसंख्या मन्त्रालयका क्षेत्रीय निर्देशक महम्मद दाउतले संघीय सरकारले सातै प्रदेशमा हेल्थ डेस्क र क्वारेन्टाइनको व्यवस्था गर्न लागेकाले सम्बन्धित प्रदेश सरकारले पनि उक्त रोकथामका लागि आवश्यक सतर्कता अपनाउन आग्रह गरे ।

तपाईको प्रतिक्रिया