कोरोना रोकथाम कोषलाई कांग्रेस सांसदले १५ दिनको भत्ता दिने

सैलुङअनलाइन
सैलुङअनलाइन संवाददाता
काठमाडौ

प्रमुख प्रतिपक्षी दल नेपाली कांग्रेसका संघीय सांसदले नेपाल सरकारद्वारा स्थापना गरिएको ‘कोरोना भाइरस (कोभिड–१९) संक्रमण रोकथाम, नियन्त्रण तथा उपचार कोषमा १५ दिनको पारिश्रमिक बराबरको रकम सहयोग गर्ने भएका छन् ।

सरकारद्वारा स्थापना गरिएको उक्त कोषमा कांग्रेसका संघीय सांसदले उक्त रकम दिने निर्णय भएको पार्टीका प्रमुख सचेतक बालकृष्ण खाँडले जानकारी दिए ।

विश्वभर महामारीको रुपमा फैलिएको कोरोना भाइरस रोगको संक्रमण फैलन नदिन सरकारले गरेको लकडाउन स्वागतयोग्य भएको कांग्रेस संसदीय दलको भनाइ छ । सरकारले गरेको एक हप्ता लकडाउनलाई संसदीय दलले पूर्ण रुपले पालन गर्न सबैलाई आग्रहसमेत गरेको छ ।

कांग्रेस संसदीय दलले लकडाउनको अवस्थामा दैनिक श्रम गर्दै जीवन निर्वाह गर्ने श्रमिकलाई जीवनयापन गर्न कठिनाई हुने भएको हुँदा श्रमिकलाई सहजरुपमा खाद्यान्न उपलब्ध गराउने व्यवस्थाका लागि सकारसँग आग्रह गरेको छ । काँग्रेस ससंदीय दलले वर्तमान विषम परिस्थितिमा सम्पूर्ण नेपाली एक जुट भई धैर्यसाथ चुनौतीको सामना गर्न अपिल समेत गरेको छ ।

तपाईको प्रतिक्रिया