कर्णालीको बजेट ३३ अर्ब ७४ करोड

सैलुङअनलाइन
सैलुङअनलाइन संवाददाता
सुर्खेत

कर्णाली प्रदेश सरकारले आगामी आर्थिक वर्ष २०७७/७८ का लागि ३३ अर्ब ७४ करोड रुपैयाँ बजेट विनियोजन गरेको छ । कर्णाली प्रदेश सरकारका आर्थिक मामिला तथा योजनामन्त्री प्रकाश ज्वालाले प्रदेशसभाको छैटाैं अधिवेशनको १२ औँ बैठकमा आगामी वर्षका लागि राजश्व र व्ययका वार्षिक अनुमानसहितको उक्त बजेट आज प्रस्तुत गरिएको हो । प्रस्तुत बजेट अनुसार प्रदेश सरकारको आगामी आव २०७७÷७८ का लागि ३३ अर्ब ७४ करोड १३ लाख ५३ हजार रुपैयाँ बजेट प्रस्तुत गरिएको छ ।

जसअनुसार पूँजीगततर्फ १९ अर्ब छ करोड ९१ लाख २१ हजार रुपैयाँ र चालूतर्फ ११ अर्ब ६७ करोड ५७ लाख ३२ हजार रुपैयाँ र वित्तीय हस्तान्तरणतर्फ दुई अर्ब ९९ करोड ६५ लाख रुपैयाँ बजेट विनियोजन गरिएको छ । चालू खर्चअन्तर्गत कोभिड–१९ को रोकथाम, नियन्त्रण तथा उपचारका लागि ८७ करोड ४१ लख रुपैयाँ, रोजगारीका लागि दुई अर्ब ५८ करोड २६ लाख रुपैयाँ र अन्य कार्य तथा प्रशासनिक खर्च आठ अर्ब ५१ करोड ९० लाख ३२ हजार रुपैयाँ रहेको छ ।

अनुमानित खर्च व्यहोर्ने स्रोतमध्ये आन्तरिक राजश्वबाट ३० करोड छ लाख ५३ हजार रुपैयाँ, चालु आवको खर्च नभई बचत हुने रकम ११ अर्ब १९ करोड नौ लाख ८५ हजार रुपैयाँ, सङ्घीय सरकारबाट राजश्व बाँडफाँडवापत प्राप्त हुन आएको सात अर्ब ३९ करोड ५६ लाख रुपैयाँ, वित्तीय समानीकरणबाट प्राप्त भएको नौ अर्ब ६३ करोड २९ लाख रुपैयाँ र सशर्त अनुदानबाट चार अर्ब ४९ करोड ११ लाख रुपैयाँ परिचालन गरिनेछ ।

नेपाल सरकारको समपुरक अनुदानवापत् २५ करोड २५ लाख रुपैयाँ, विशेष अनुदानवापत् ४६ करोड रुपैयाँ प्राप्त हुने अनुमान गरिएको छ । वैदेशिक अनुदान सहायताबाट सञ्चालित हुने कार्यक्रममा एक करोड ७६ लाख १५ हजार रुपैयाँ स्रोत परिचालन हुने जनाइएको छ । प्रदेश सरकारले विश्वव्यापी महामारीका रुपमा फैलिएको –कोभिड १९ बाट उत्पन्न महामारी, त्यसले सिर्जना गर्ने सम्भावित भोकमरी र समाधानका लागि स्वास्थ्य, कृषि उत्पादन र रोजगारीलाई केन्द्रविन्दु बनाएर बजेट ल्याएको छ ।


तपाईको प्रतिक्रिया