लिबिया सरकार र विपक्षीसँग इटालीका विदेशमन्त्रीद्वारा भेटवार्ता

सैलुङअनलाइन
सैलुङअनलाइन संवाददाता
लिबिया

इटालीका विदेशमन्त्री लुइजी डी माइयोले युद्धरत लिबियाका नेताहरुसँग भेटवार्ता गरेको छ । राष्ट्रसंघको मान्यताप्राप्त लिबियाली सरकार र विपक्षीबीच युद्धबिराम भएलगत्तै इटालीका विदेशमन्त्री माइयो मंगलबार त्रिपोली पुग्नु भएको हो ।

त्रिपोलीमा माइयोले लिबियाली सरकार प्रमुख फायेज सर्राजसँग भेटवार्ता गरेको छ । लिबियाली अधिकारीहरुका अनुसार मन्त्री माइयोले टोब्रुकस्थित विपक्षी संसदका सभामुख अगिला सालेहसँग पनि भेट गर्नु हुनेछ ।

सन् २०११ मा नेटोको अग्रसरतामा भएको आन्दोलनबाट मोहम्मद गद्दाफीको शासन ढलेयता लिबियामा अस्थिरता जारी छ । लिबियाको राजधानीसहितका क्षेत्रमा पश्चिमा राष्ट्रहरु र राष्ट्रसंघ समर्थित सरकार रहेको छ भने पूर्वी क्षेत्रमा खलिफा हिफ्तारका लडाकूहरुको नियन्त्रण छ ।

सर्राजले गत अगष्ट २१ मा युद्धबिरामको घोषणा गर्नु भएको थियो । उनले सर्ते शहरलाई गैरसैनिक क्षेत्र बनाउन आह्वान समेत गरेको छ । यो शहरहुँदै लिबियाको मुख्य तेल निर्यात टर्मिनल पुग्न सकिन्छ जहाँ हिफ्तारका लडाकूको नियन्त्रण कायम छ ।


सर्राजको कार्यालयले जारी गरेको वक्तव्यमा डी माइयोसँगको भेटवार्तामा स्थायी युद्धबिराम र सर्ते तथा जुफ्रालाई गैरसैनिक क्षेत्रमा रुपान्तरण गर्ने बारेमा सालेहसँग सम्झौता भएको जनाइएको छ । यसैबीच युरोपेली युनियनका विदेश मामिला प्रमुख जोसेफ बोरेलले पनि त्रिपोलीमा सर्राजसँग भेटवार्ता गर्नु भएको छ । विगतमा पनि युद्धरत दुबै पक्षबीच युद्धबिराम भए पनि त्यो दिगो हुन सकेको थिएन ।

हिफ्तारका सैनिकले त्रिपोलीलाई नियन्त्रणमा लिन सन् २०१९ को अप्रिलदेखि सशस्त्र कारबाही थालेको थियो । तर टर्कीको सहयोगमा त्रिपोली सरकारले हिफ्तारको अभियानलाई गत जुनमा धराशायी बनाएको थियो । त्रिपोली नजिक पुगेका हिफ्तारका सैनिकलाई त्रिपोली सरकारले परास्त गरेको थियो ।

तपाईको प्रतिक्रिया

पत्रपत्रिका