साउदीमा शनिबार पनि सात सयभन्दा धेरै कोरोना संक्रमित निको

साउदीमा अहिलेसम्म तीन लाख ३२ हजारभन्दा धेरै संक्रमित

नवराज तामाङ
नवराज तामाङ संवाददाता
साउदी अरेबिया

साउदी अरेबियामा कोरोना भाइरस (कोभिड-१९) उपचारपछि निको हुनेको संख्या बढ्नेक्रम जारी छ । यसै क्रममा शनिबार कोरोना भाइरस उपचारपछि ७६९ जना निको भएको स्वास्थ्य मन्त्रालयका प्रवक्ता डा.मोहम्मद अल अब्दुलीले जानकारी दिए ।

प्रवक्ता डा. अब्दुलीका अनुसार अहिलेसम्म कुल कोरोना भाइरस तीन लाख १६ हजार ४०५ जना उपचारपछि निको भैसकेका छन् ।

त्यसैगरी शनिबार कोरोना भाइरस नयाँ संक्रमित ४६१ जना थपिएको भएको प्रवक्ता डा.अब्दुलीले जानकारी दिए । उनका अनुसार हालसम्म साउदी अरेबियामा तीन लाख ३२ हजार ७९० जना कोरोना भाइरसबाट संक्रमित भैसकेका छन् । कुल संक्रमितमध्ये ११ हजार ७३० जना बिरामीहरु यहाँका कोभिड अस्पतालहरुमा उपचाररत रहेको प्रवक्ता डा.अब्दुलीले बताए । उनका अनुसार १ हजार ३५ जना बिरामीको अवस्था भने गम्भीर रहेका छन् ।

यहाँ शनिबार कोरोनाबाट ३० जनाको मृत्यु भएको प्रवक्ता डा.अब्दुलीले बताए । उनका अनुसार अहिलेसम्म कोरोना भाइरसबाट ४ हजार ६५५ जनाले ज्यान गुमाएका छन् ।


साउदीमा कोरोनाको संकेत देखिएमा स्वास्थ मन्त्रालयको टोल फ्री नम्बर ९३७ मा फोन गर्नसक्ने प्रवक्ता डा. अब्दुलालीले बताए । ‘ We are all responsible ’ भन्ने नारालाई आत्मसात गरी कोभीड-१९ रोकथामका लागि सरकारले गरेका प्रयासलाई सबैले सहयोग गर्न प्रवक्ता डा.अब्दुलालीले आग्रह गरे ।

त्यसैगरी साउदीमा विभिन्न स्रोतका अनुसार झन्डै ६ हजारको हाराहारीमा नेपालीहरुसमेत संक्रमित भएका छन् । तीमध्ये ६० भन्दा बढी नेपालीको कोरानाबाट मृत्यु भैसकेको जानकारी आएको दूतावासको भनाइ छ । दूतावासका अनुसार अन्य संक्रमितहरु सबैजसो निको भैसकेका छन् ।

रोजगारीका लागि साउदी आइपुगेका नेपालीहरु कोरोनाका कारण कति पीडित भए वा मृत्यु त्यसको यकिन तथ्यांकका लागि दूतावास लागि रहेको राजदूत महेन्द्रप्रसाद सिंह राजपुतले बताए । ‘ बाहिर हल्ला भएजस्तो साउदीमा त्यति धेरै समस्या नभएको र कोरोना लागेपछि बाँच्न सकिदैन भन्ने गलत सोचका कारण यहाँ कार्यरत नेपालीहरु आत्तिएको ‘, उनले भने,’ कोरोनाले पीडित भएकाहरूको पहिचान गरि दूतावासले खाद्यान्न सामाग्री लगायत उपलब्ध गराउदै आएको र पीडितहरुलाई नेपाल पठाउन दैनिक सम्बन्धित निकायसँग सहकार्य गरिरहेका छौं ।’

तपाईको प्रतिक्रिया