श्रीरामका डोब, लकडाउन र नाङ्गो सपना सार्वजनिक

सविन घिसिङ संवाददाता
काठमाण्डौं

साहित्यकार श्रीराम श्रेष्ठद्वारा जापानी शैलीमा लेखिएका तीनवटा साहित्यिक कृतिहरु डोब, लकडाउन र नाङ्गो सपना विमोचन गरिएको छ । शुक्रबार राजधानीमा आयोजित एक कार्यक्रमबीच शिक्षा मन्त्रालयका सचिव एवं साहित्यकार गोपिनाथ मैनाली, वरिष्ठ साहित्यकार पुष्कर लोहनी, साहित्यकार लव गाउँले र बाल्मिकी क्याम्पसका उपप्राध्यापक टेकनाथ दाहालले संयुक्त रुपमा कृति सार्वजनिक गरेका हुन् ।

जापानी साहित्यमा प्रचलित शैलीहरु डोडोइट्सु, बुसोकुसेकिका र सेडोका क्रमशः डोब, नाङ्गो सपना र लकडाउनमा प्रस्तुत गरिएको छ ।
विमोचित कृतिका विषयमा बोल्दै प्रमुख अतिथि मैनालीले कृतिहरु नेपाली साहित्यमा जापानी शैलीको नौलो प्रस्तुती रहेको उल्लेख गरे । उनले थपे – हिजोआज विकसित डाटा, इन्फोटेक र बायोटेकले मानवीय भावना बुझ्न सकिदैन तर साहित्यले अवश्य बुझेर प्रकट गर्छन् ।

यसैगरी समालोचक एवं उपप्राध्यापक दाहालले कृतिमा समसामयिक चेतनालाई सरलिकृत ढंगले प्रस्तुति भएको उल्लेख गरे । उनले कवि श्रेष्ठको योगदानले नुवाकोटमा उल्लेख्य स्रष्टा जन्मिएको स्मरण समेत गरे ।


वरिष्ठ साहित्यकार लोहनीले जापानी शैलीका कविताका सैद्धान्तिक प्रयोगात्मक पक्षका बारेमा चर्चा गरेका थिए । उनले थपे ( यसअघि हाइकु र तांका व्यापक लेखेका छन् अब कृतिकार श्रेष्ठले यस किसिमको शैलीमा पहिलो पुस्तक ल्याएकोमा गौरवान्वित महसुस गरेको छु ।

कृतिकार श्रेष्ठले कृतिका रचनागर्भ बारेमा आफ्ना भनाइ राख्दै लकडाउनको प्रारम्भिक समय त्रासदी भएपनि पछिको समय आरामले सदुपयोग गरेको बताए ।

डोबमा २ सय ८ डोडोइट्सु रहेका छन् । यसमा अंग्रेजी अनुवाद पनि रहेको छ ।लकडाउनमा भने २६१ सेडोका रहेका छन् । यसैगरी नाङ्गो सपनामा ३२१ बुसोकुसेकिका रहेका छन् ।कार्यक्रम साहित्यकार लव गाउँलेले सञ्चालन गरेका थिए ।

तपाईको प्रतिक्रिया