ह्वाइट हाउसको बार्दलीबाट ट्रम्पको सम्बोधन

सैलुङअनलाइन
सैलुङअनलाइन संवाददाता
अमेरिका

संयुक्तराज्य अमेरिकाका राष्ट्रपति डोनाल्ड ट्रम्पले कोरोना भाइरसको संक्रमणबाट आफू निको भएको जनाउँदै आफ्ना समर्थकलाई ह्वाइट हाउसको बार्दली (बाल्कोनी)बाट शनिबार साँझ सम्बोधन गरेको छ ।

ट्रम्पका निजी चिकित्सकहरुले राष्ट्रपति कोरोना भाइरस संक्रमणको जोखिम नरहेको दाबी गरेका छन् । राष्ट्रपति ट्रम्पलाई गत अक्टोबर २ तारिखमा कोरोना भाइरस संक्रमण पुष्टी भएसँगै अमेरिकी सैनिक अस्पतालमा उपचार गरिएको थियो । राष्ट्रपति ट्रम्पका निजी चिकित्सक फिजिसियन डा.सिन कोन्लेले ट्रम्पको शनिबार गरिएको परीक्षणमा कोरानाका लक्षणहरु नदेखिएको र उनी पूर्ण स्वस्थ रहेको बताएको छ ।

अमेरिकामा हालसम्म ७७ लाखभन्दा बढी मानिस कोराना भाइरसबाट संक्रमित भइसकेका छन् , भने २ लाख १३ हजारभन्दा बढीको ज्यान गइसकेको छ । राष्ट्रपति ट्रम्पमाथि कोरोना महामारीलाई नियन्त्रणमा ल्याउन पर्याप्त काम नगरेको आरोप लाग्दै आएको छ । राष्ट्रपति स्वयंले मास्क लगाउने र सामाजिक दूरी कायम गर्ने नीतिमाथि व्यंज्ञ गर्दै आएको छ ।


ह्वाइट हाउसको शनिबार आयोजित सार्वजनिक समारोहमा पनि राष्ट्रपति ट्रम्पले मास्क लाएन । तर उनका वरिपरि अरु व्यक्ति थिएनन् । कोरोना उपचार पछि ट्रम्प गत सोमबार ह्वाइट हाउस फर्किएको थियो । राष्ट्रिय मत सर्वेक्षणमा विपक्षी डेमोक्रेटिक पार्टीका उम्मेदवार जो बाइडेनभन्दा पछि देखिएका राष्ट्रपति ट्रम्पले अब विभिन्न राज्यमा चुनावी सभाहरुमा सम्बोधन गर्ने कार्यक्रम छ ।

अमेरिकामा आगामी नोभेम्बर ३ मा राष्ट्रपतिका लागि चुनाव हुँदैछ । राष्ट्रपति ट्रम्पले सोमबार फ्लोरिडामा सम्बोधन गरी मंगलबार र बुधबार क्रमशः पेन्सिलभेनिया र आयोवा राज्यमा चुनावी सभामा सम्बोधन गर्नेछन् । ह्वाइट हाउसको सम्बोधनमा उनी निकै आत्मबलका साथ बोलेको थियो ।

राष्ट्रपति ट्रम्पले विगतमा झैं विपक्षी डेमोक्रेटमाथि ‘समाजवादी’ र ‘वामपन्थी’ एजेन्डा बोकेको आरोप लगाएको थियो । आफूले कानुनी शासन र अर्थतन्त्रलाई सही बाटोमा ल्याउन निरन्तर कार्य गरिरहेको दाबी गरेको थियो ।

तपाईको प्रतिक्रिया