वैदेशिक रोजगारलाई सुरक्षित, व्यवस्थीत र पारदर्शी बनाउने उद्देश्यले सञ्चालित डिजिटल प्लेटफर्म माइग्रेण्ट रिक्रुटमेण्ट एडभाइजर (एमआरए) का विषयमा छलफल कार्यक्रम सम्पन्न भएको छ । जिफन्टद्वारा आयोजित कार्यक्रममा ट्रेड यूनियन, सुरक्षित आप्रवासनको क्षेत्रमा कार्यरत गैरसरकारी संस्थाहरु, अनुसन्धानकर्ताहरु, पत्रकारहरु सहभागि थिए ।
कार्यक्रममा बोल्दै संयुक्त ट्रेड यूनियन समन्वय केन्द्र (जेटीयूसीसी) का अध्यक्ष तथा जिफन्ट अध्यक्ष विनोद श्रेष्ठले वैदेशिक रोजगारीमा जाने योजना बनाइरहेकाहरु तथा वैदेशिक रोजगारको क्रममा रहेकाहरुलाई मद्दत गर्ने उद्धेश्यले रिक्रुटमेण्ट एडभाइजर मार्फत् काम गरिएको बताए । उनले वैदेशिक रोजगार नेपालका लागि दिर्घकालिन नभई अल्पकालिन रोजगारीको उपाय मात्र भएको भन्दै यसलाई व्यवस्थीत, मर्यादित र सुरक्षित बनाउन ट्रेड यूनियनहरु, सरकार तथा गैरसरकारी संघसंस्थावीचमा मजबूत सहकार्यको खाँचो औंल्याए ।
कार्यक्रममा सार्टुकका महासचिव लक्ष्मण बहादुर बस्नेतले रोजगारीका लागि कामदार पठाउने मुलुकहरु एक नभएसम्म खाडीका मुलुकहरुलाई श्रमिकमैत्री कानून, नियम बनाउन बाध्य बनाउन नसकिने धारणा राखे । उनले वैदेशिक रोजगारलाई मर्यादित बनाउन सरकारले अझ धेरै काम गर्न जरुरी रहेको बताए ।
महासचिव बस्नेतले नेपालमा ९ वटा ट्रेड यूनियनहरु श्रमको मुद्दामा एक रहेको भन्दै यसमा गैरसरकारी संघसंस्थाहरु पनि एकतावद्ध हुन आवश्यक रहेको धारणा राखे ।
कार्यक्रममा सुरक्षित आप्रवासनका लागि राष्ट्रिय सञ्जाल (एनएनएसएम) का अध्यक्ष कुल प्रसाद कार्कीले वैदेशिक रोजगारलाई मर्यादित र उपलव्धीमूलक बनाउन आफूहरुले पनि एकिकृत ढंगमा नै काम गरिरहेको प्रष्ट्याए । उनले यसका लागि गैरसरकारी संस्थाहरुबीच मात्र नभई संयुक्त ट्रेड यूनियन समन्वय केन्द्र तथा सञ्जालवीच पनि सहकार्य सुरु गरिएको स्मरण गरे । सरकार, ट्रेड यूनियनहरु, गैरसरकारी संस्थाहरु, रोजगारदाताहरु मिलेर नै ग्लोवल कम्प्याक्ट फर माइग्रेसन(जिसिएम) को लक्ष्य हासिल गर्न सकिने उनको भनाई थियो ।
जिफन्टका महासचिव जनक चौधरीले वैदेशिक रोजगारलाई सुरक्षित बनाउन तथा श्रमिकका लागि उपलव्धीमूलक बनाउन महासंघले झण्डै तीन दशकदेखि काम गरिरहेको बताए । उनले यस क्षेत्रमा कृयाशिल सवैको सहकार्यमा श्रमिकको जीवनलाई उन्नत बनाउन र रोजगारीलाई मर्यादित बनाउन सकिने धारणा राखे ।
कार्यक्रममा एमआरए परियोजनाका नेपाल संयोजक सुनिल न्यौपानेले एमआरएको डिजिटल प्लेटफर्म, हालसम्म गरिएका कामहरु तथा आइपरेका समस्याहरुका बारेमा प्रस्तुती राखे ।
त्यसैगरी सहभागिहरुले यसमा गर्नुपर्ने सुधार तथा अपनाउनु पर्ने सचेतनाका विषयमा सुझाव दिएका थिए ।
माइग्रेण्ट रिक्रुटमेण्ट एडभाइजर (एमआरए) अन्तर्गत सन् २०१६ देखि www.recruitmentadvisor.org वेभसाईट सञ्चालनमा छ । विभिन्न भाषामा रहेको यो वेभसाईटमा नेपाली पेजका लागि भनें www.recruitmentadvisor.org/ne रहेको छ । यो वेभसाईट जिफन्ट, आइटीयूसी तथा आइएलओको साझेदारीमा सञ्चालन गरिएको हो । यसमा वैदेशिक रोजगारमा गएका वा जाने प्रकृया पूरा गरिसकेका श्रमिकले सो मेनपावर कम्पनीले दिएको सेवाका आधारमा त्यसको मूल्याङ्कन गर्ने गर्दछन् । श्रमिककै मूल्याङ्कनका आधारमा मेनपावर कम्पनीहरुको स्तर निर्धारण हुने गरेको छ ।
