चौथो आइसिटी अवार्ड २०१९ सम्पन्न भएको छ । लिभिङ विथ आइसिटीको आयोजनामा शनिबार राजधानीस्थित सोल्टी क्राउन प्लाजामा भएको अवार्डको ग्रान्ड फिनालेमा विभिन्न १० विधामा अवार्ड वितरण गरियो ।
अवार्ड कार्यक्रमका विजयीहरुलाई शिक्षा, विज्ञान तथा प्रविधिमन्त्री गिरिराजमणि पोखरेल, पूर्वमन्त्री गणेश साह, पूर्वमन्त्री एवं सांसद महेश बस्नेत र अन्य विशिष्ट अतिथिले सम्मान गरेका थिए ।
१० विधाअन्तर्गत स्टार्टअप आइसिटी अवार्ड ई-डिजिटल नेपाल प्रा.लि.ले प्राप्त गरे भने प्रडक्ट आइसिटी अवार्ड मेडिफ्लो सिस्टम एन्ड सर्भिसेसले हात पा¥यो । त्यस्तै राइजिङ स्टुडेन्ट प्रोजेक्ट अवार्ड पुल्चोक क्याम्पसका विद्यार्थीहरुले विकास गरेको प्लाटफर्म ‘रक्तदान’ले जित्न सफल भयो ।
यस वर्षको आइसिटी पायोनियर अवार्ड राष्ट्रिय आविष्कार केन्द्रका अध्यक्ष एवं विकास अभियान्ता महावीर पुनलाई वितरण गरियो । त्यसैगरी आइसिटी आन्टरप्रेनियर अवार्ड जानकी टेक्नोलोजीका प्रमुख कार्यकारी अधिकृत अमित अग्रवालले प्राप्त गरे । विदेशमा रहेर पनि नेपालको आइटी क्षेत्रमा उल्लेख्य योगदान दिने व्यक्तिलाई दिइने नेपाली डायस्पोरा आइसिटी अवार्ड प्रसिद्ध एआई कम्पनी फ्युज मेशिनका संस्थापक डा.समीर मास्केले प्राप्त गरे ।
आइसिटी अवार्ड अन्तर्गत सार्वजनिक सेवाप्रवाहमा सूचना प्रविधिको उच्चतम प्रयोग गर्ने सरकारी कार्यालय/संस्थालाई दिइने डिजिटल गभर्नेन्स अवार्ड लोकसेवा आयोगले प्राप्त गरेको छ । त्यसैगरी सूचना प्रविधिलाई अधिकतम प्रयोग गरी शिक्षण पद्धतिमा सुधार ल्याएको मूल्याकंन गर्दै नेपाल खुला विश्वविद्यालयलाई डिजिटल एजुकेशन आइसिटी अवार्ड वितरण गरियो ।
कान्तिपुर दैनिकका पत्रकार विजय तिमिल्सनालाई मिडिया पर्सन आइसिटी अवार्ड वितरण गरियो भने १९ वटा प्रडक्ट तथा स्टार्टअपमध्ये किताबयात्रा प्रालिले पब्लिक च्वाइस अवार्ड २०१९ प्राप्त गरे । त्यस्तै कार्यक्रममा स्व. कर्मठ डंगोललाई आइसिटी मरणोपरान्त सम्मान दिइएको थियो ।
