फुलारा फाउण्डेशनद्वारा ‘राष्ट्रिय मानार्थ सम्मान-२०७८’ सार्वजनिक

सैलुङअनलाइन संवाददाता
काठमाडाैं

‘हाम्रो एकै दृष्टिकोण, लक्ष्य र उद्देश्य-नेपाली मौलिक कला, संस्कृति र साहित्य’ भन्ने मूल नाराका साथ फुलारा लिटरेचर फाउन्डेसन नेपालद्वारा ’राष्ट्रिय मानार्थ सम्मान-२०७८’ प्रदान गरेको छ । नेपाली कला, संस्कृति, समाज, भाषा, साहित्य, चलचित्र, पत्रकारिता लगायतका विधामा रही विशिष्ट योगदान दिएका व्यक्तिहरूलाई राष्ट्रिय मानार्थ सम्मान -२०७८’ प्रदान गरिएको आयोजकले बताएको छ । यो सम्मान अनलाइनमार्फत वितरण गरिएको हो ।

विधागत रूपमा रहेका सम्मानित व्यक्तित्वहरूको नामावली, प्रमाण पत्र र शुभकामना पत्र फेसबुक, इमेल, भाइबर र ह्वाट्सएपमार्फत् सार्वजनिक गरिएको छ ।

३१२ जना व्यक्तित्वहरूलाई संस्थाको तेस्रो वार्षिक उत्सवको अवसरमा सम्मान गरिएको  संस्थाका अध्यक्ष भीष्मराज फुलाराले बताए । संस्थाका अध्यक्ष फुलाराका अनुसार कोभिड १९ कम हुँदै गएको देखिएता पनि यसको प्रभाव र असरहरू अझै बाँकी रहेकोले अनलाइन माध्यम मार्फत सम्मान वितरण गरिएको हो ।

संस्थाले स्वदेश तथा विदेशमा रही लेखन, कलाकारिता, सङ्गीत, पत्रकारिता, सामाजिक सेवा, सौन्दर्य फेसन र व्यवसायमा आफ्नो उत्कृष्टता प्रदर्शन गरिएका व्यक्तिहरूलाई राष्ट्रिय मानार्थ सम्मान वितरण गरिएको जनाएको छ । यस अवसरमा लेखनमा ३४ जना, चलचित्रमा ९५ जना, सङ्गीतमा ५१ जना, पत्रकारितामा ४८ जना, सामाजिक सेवामा ३२ जना, सौन्दर्य फेसनमा २८ जना, व्यवसायमा ४ जना र अन्तर्राष्ट्रियमा ३० जना गरी ३१२ जना सम्मानित भएका छन् ।

लेखन विधातर्फ नेपाली वाङमय शताब्दी पुरुष तथा संस्कृतिविद् सत्यमोहन जोशी, नेपाली महिला लेखिका माया ठकुरी, नेपाली भाषाका साहित्यकार कृष्ण धरावासी, पूर्णकालिक लेखक बुद्धि सागर लयागत नेपाली वाङमय साहित्यका प्रखर लेखकहरू भैरव रिसाल, नयन राज पाण्डे, अमर न्यौपाने, रामलाल जोशी, सुविन भट्टराई, जिएस पौडेल, राम कुमार पांडे लगायत ३४ जना सम्मानित भएको छ । पांडे अन्तर्राष्ट्रिय लेखक सङ्घ नेपाल च्याप्टरका अध्यक्ष समेत हुन् ।

कला र कलाकारिता विधातर्फ अभिनेता, अभिनेत्री, चरित्र अभिनेता, निर्माता, निर्देशक, छाँयाकार, सम्पादक, भिएफएक्स कलाकार, चलचित्र लेखक, मेकअप कलाकार, सङ्गीतकार, गीतकार, नृत्य निर्देशक, द्वन्द्व निर्देशक, फेसन डिजाइनर लगायतका ९५ जना चलचित्रकर्मीहरूले सम्मान प्राप्त गरिएको छ । सम्मान प्राप्त गर्नु हुने चलचित्रकर्मीहरूमा महानायक राजेश हमाल, निर शाह, भुवन केसी, धिरेन शाक्य, करिश्मा मानन्धर, रवीन्द्र खड्का, मोहन निरौला, तीर्थ थापा, दयाराम दाहाल, आकाश अधिकारी, प्रदीप कुमार उदय, छविराज ओझा, रोज राणा, उज्ज्वल घिमिरे, उमेश खड्का, दिनेश डिसी, सविर श्रेष्ठ, सुचित्रा श्रेष्ठ, निखिल उप्रेती, बिराज भट्ट, निता ढुङ्गाना, नबल खड्का, पुकार भट्टराई, ज्योति काफ्ले, हिमाल केसी, पुष्कर लामा, रेनिश फागो लगायत रहेको छ ।

सङ्गीत विधातर्फ सङ्गीतकार, गायक, गायिका, गीत रचना, साउन्ड रेकडिट्स, एरेन्जर, म्युजिक भिडियो निर्देशक, मोडल कलाकार लगायत ५१ जना व्यक्तित्व सम्मानित भएको छ । सम्मान प्राप्त गर्नु हुनेहरूमा भजन शिरोमणि भक्तराज आचार्य, शम्भुजित बास्कोटा, सत्यकला राई, राजु सिंह, रामकृष्ण ढकाल, स्वरूपराज आचार्य, अन्जु पन्त, कृष्ण कँडेल, शिव परियार, चेतन सापकोटा, अर्जुन पोखरेल, धर्मराज उपाध्याय, किशोर थापा,कविराज गहतराज, रामजी लामिछाने, शङ्कर बिसी, शिव विक, क्रान्ति केसी, आदित्य बुढाथोकी लगायत छन् ।

यसै गरी पत्रकारिता विधातर्फ रेडियो, टेलिभिजन, छापा र डिजिटल मिडियामा रहेर उत्कृष्ट योगदान गर्नुभएका ४८ जना पत्रकारलाई राष्ट्रिय मानार्थ सम्मान प्रदान गरिएको छ । सम्मान पाउने व्यतित्वहरू बालकृष्ण बस्नेत, फुलमान बल, रबी लामिछाने, ऋषि धमला, मनहरी थापा, अनन्त वाग्ले, विदुर गिरी, गीता अधिकारी, कुवेर गिरी, टिबी विरही लगायत रहेको छ ।

यस अवसरमा सामाजिक सेवामा सक्रिय रही अमूल्य योगदान गर्नुभएका ३२ जना व्यक्तित्वले सम्मान प्राप्त गर्नुभएको छ । सामाजिक अभियन्ताहरू यज्ञराज पाठक, मोहन बहादुर केसी, मुकुन्द पौडेल, प्रदीप रिजाल, सानुभाई खड्का लगायतले सम्मान प्राप्त गर्नुभएको छ । सौन्दर्य फेसन विधातर्फ इनु थापा, सङ्गीता थापा, रिना शाक्य, छब्बु कार्की, नारायण भट्टराई, सुनिता मरासैनी, निशा राना, अमृता कँडेल लगायतले सम्मान प्राप्त गरिएको छ । यस विधामा २८ जना सम्मानित भएको छ ।

त्यस्तै, अन्तर्राष्ट्रिय क्षेत्रमा विभिन्न पेसा व्यवसायमा सक्रिय रही नेपाली कला, संस्कृति र साहित्य क्षेत्रमा अमूल्य योगदान गर्नुभएका वकिल तथा व्यवसायी लगायतलाई सम्मान गरिएको छ । वरिष्ठ अधिवक्ता खगेन्द्र जिसी, राजनीतिज्ञ एवं सामाजिक अभियन्ता आनन्द विष्ट, व्यवसायी वाला घिमिरे, विश्वनाथ बराल सञ्चारकर्मीहरू कृष्ण केसी, सङ्गीता थापा, किरण मरहट्ठा, किशोर पन्थी, तोया दाहाल, विकास न्यौपाने, विशाल पौडेल तथा गायक कलाकार यम बराल, समाजसेवी मकेन्द्र सिंह, तेजेन्द्र कँडेल लगायत ३० जना व्यक्तित्वहरू सम्मानित भएको छ ।

आफ्नो स्थापनाकालदेखि नै फुलारा लिटरेचर फाउन्डेसन नेपाल आफ्नो दृष्टिकोण, लक्ष्य र उद्देश्यप्रति कटिबद्ध रहेको र देश भित्र र देश बाहिर नेपाली मौलिक कला, संस्कृति र साहित्यको संरक्षण, संवर्द्धन र विकासमा अगाडी बढिरहेको संस्थाका वरिष्ठ उपाध्यक्ष मानबहादुर थापाले बताए । फुलारा लिटरेचर फाउन्डेसन नेपालको संस्थापक संरक्षक तथा कानुनी सल्लाहकार विगत १५ वर्षदेखि अटूटरूपमा अमेरिकामा रहेर कानुनी व्यवसायी तथा सामाजिकीकरण अभियानमा सक्रिय बासु फुलारा छन् ।

तपाईको प्रतिक्रिया