‘एक दिनमा सय ग्रामभन्दा बढी मासु खानु हुँदैन’

सैलुङअनलाइन संवाददाता
काठमाडाैं

नेपालीको घर घरमा दसैँ भित्रिसकेको छ । दसैँको पहिलो दिन घरघरमा घटस्थापना गरेपछि दसैँ सुरु भएको हो ।

दसैँमा सबैभन्दा धेरै मासु कै परिकार पाक्छन् । यही कारण दसैँमा मासुको खपत अत्यधिक हुने गर्छ । सामान्य समयभन्दा यो समयमा झन्डै १० गुना बढी मासु खपत हुने अनुमान छ । विशेषतः फूलपातीको दिन ल्याएको मासु दसैँभरि लगाएर खाने चलन छ । तर, यसरी सेवन गरिने मासु स्वास्थ्यका लागि भने फाइदाजनक हुँदैन ।

फूलपातीको दिन पकाएको मासु भुटेर, फ्रिजमा राखेर अनेक विधि अपनाएर स्टक गरिन्छ, तर यसरी राखिएका मासु स्वास्थ्यका दृष्टिकोणले अस्वस्थ साबित हुन्छ ।

मासुजन्य परिकारमा शरीरका लागि आवश्यक प्रोटिन प्रशस्त हुने भए पनि धेरै मासु खानु शरीरका लागि हानिकार हुने पोषणविद् अरुणा उप्रेतीको भनाइ छ । एक जना व्यक्तिले प्रतिदिन एक सय ग्रामसम्म मासु सेवन गर्नुपर्छ । त्यो भन्दाबढी अस्वस्थ मानिन्छ । ‘चाडबाडमा सबै जनासँगै बसेर खानेकुरा खाने मात्रै काम हुन्छ । पकायो खायो जसले गर्दा भोजनमा सन्तुलन कायम हुँदैन,’ उप्रेती भन्छिन्,’ मिलाएर खायो भने मासु लाभदायक हुन सक्छ, जथाभाबी खाँदा हानिकारक हुन्छ ।’

बडादसैँको समय मौसमी फ्लु जस्ता रोगहरूको सङ्क्रमणको जोखिम पनि हुन्छ । बालबालिका तथा वृद्धवृद्धाले अझ बढी स्वास्थ्य सतर्कता अपनाउनु पर्छ । मासु आफैँमा अत्यधिक बोसो हुने र पकाउँदा पनि धेरै तेल प्रयोग गरिने भएकोले मासु खाँदा स्वास्थ्यमा असर पुग्ने हुन्छ ।

मासुसँगै दसैँको समयमा मद्यपान गर्दा यो झनै हानिकारक हुन्छ । अझ मासु पकाउँदा आगोमा पोलेर, तारेर पकाउँदा यस्तो खान्कीले मधुमेह, उच्च रक्तचाप तथा क्यान्सर गराउने तत्त्व शरीरमा उत्पादन गराउन मद्दत पुर्‍याउँछ । साथै, पाचन प्रणालीमा समेत यसले गम्भीर असर पुर्‍याउन सक्छ ।

स्वस्थ मासु कसरी चिन्ने ?

–मासुका लागि पशुपन्छी खरिद गर्दा स्वस्थ पशुपन्छी छान्ने ।
–धेरै मासु एकै पटक नकिन्ने, आवश्यकताअनुसार किन्ने ।
–फ्रिजमा ताजा मासुलाई ४८ घण्टासम्म मात्र राख्ने ।
–फ्रिजमा मासु राख्दा छोपेर राख्ने ।
–मासुलाई टुक्रा–टुक्रा बनाएर फ्रिजमा माइनस १८ देखि ३० डिग्री सेल्सियससम्मको तापक्रममा राख्ने ।
–मासुमा अम्लीयपनाको मात्रा ५।७ पीएचभन्दा कम र ६.३ पीएचभन्दा बढी हुनुहुँदैन ।
–मासु सकेसम्म ७२ डिग्री सेल्सियस तापक्रममा पकाउने ।

तपाईको प्रतिक्रिया