सडकमा खसेको पहिरो पन्छाएपछि खुल्यो यातायात

सैलुङअनलाइन संवाददाता
खोटाङ

खोटाङ-काठमाडौँ आउजाउ गर्ने राजमार्गका विभिन्न खण्डमा खसेको पहिरो पन्छाएपछि यातायात सेवा सुचारु भएको छ ।

३१ असोजदेखि २ कात्तिकसम्म परेको वर्षाका कारण राजमार्गका विभिन्न खण्डमा खसेको पहिरो पन्छाएपछि दिक्तेल–काठमाडौँ यातायात निर्बाध सुचारु भएको हो । पहिरो पन्छाइएपछि काठमाडौँबाट ओखलढुङ्गा र सोलुखुम्बु आवतजावत गर्ने सवारी साधनसमेत निर्बाध गुड्न थालेका छन् । सडकमा थुप्रिएको पहिरो पन्छाएर सवारीसाधन वारपार गर्ने वातावरण बनाइए पनि सडकलाई पूर्णरुपमा ‘क्लियर’ गर्न बाँकी रहेको खोटाङ यातायात प्रालिका महासचिव रामकुमार हिङमाङले बताए ।

वर्षाका कारण खोटाङको हलेसी तुवाचुङ नगरपालिका–१ बाहुनीडाँडाको कदुवा, सिन्धुलीको नागथान, कालीआँप, हैवारलगायतका स्थानमा पहिरो खस्दा सडक अवरुद्ध बनेको थियो । खुर्कोट नजिक पर्ने हैवारमा विशाल पहिरो खस्दा २-३ कात्तिकको साँझसम्म यात्रु तथा मालबाहक सवारी साधन रोकिँदा हजारौं यात्रु सडकमै अलपत्र परेका थिए । हैवारमा पहिरो खस्दा खोटाङसहित ओखलढुङ्गा र सोलुखुम्बुका यात्रु थुनिएका थिए । हैवारमा पटक–पटक पहिरो खस्ने गरेको छ ।

हैवारमा गएको पहिरोले दुई दिनसम्म बाटो थुनेपछि कतिपय यात्रु तथा मालबाहक सवारी साधन सिन्धुली–उदयपुरको कटारी–घुर्मी हुँदै ओहोर–दोहोर गरेका थिए । घुमाउरो बाटो प्रयोग गर्दा कम्तिमा १२० किलोमिटर घुम्नु परेको यातायात व्यवसायीले बताएका छन् । कदुवामा ३ कात्तिकमा पन्छाइएको पहिरो पुनस् खसेपछि ४ कात्तिक बिहान पन्छाएर सडक सुचारु गराइएको हो ।

साँघुरो सडक भएको तथा छोटो दुरीमा घुम्ती भएका कारण वर्षा याममा बढिमात्रामा सडकमा पहिरो खस्ने गरेको महासचिव हिङमाङले बताए । ‘पहिरो खसेको ठाउँमा ट्रयाक खोलियो तर अझै पनि जोखिम छ । सडक पूर्णरुपमा क्लियर गरिएको छैन,’ महासचिव हिङमाङले भने, ‘सडक चौडा नहुनु र नजिक–नजिक टर्निङ भएका कारण पहिरोले बढी क्षति पुर्‍याएको हो । छोटो टर्निङमा माथिबाट पहिरो खस्दा तल्लो टर्निङ पनि बिगारेको देखिन्छ ।’

तपाईको प्रतिक्रिया

पत्रपत्रिका