शिक्षिका मृत फेला परेपछि खोटाङमा एमालेको वडा अधिवेशन स्थगित

सैलुङअनलाइन संवाददाता
खोटाङ

शिक्षिका मृत फेला परेपछि खोटाङको रावाबेँसी गाउँपालिका-६ हौंचुरमा एमालेको वडा अधिवेसन स्थगित भएको छ । हौंचुरस्थित जनता आधारभूत विद्यालयमा निजी स्रोतमा कार्यरत २७ वर्षीय शिक्षिका कृष्णा श्रेष्ठ ६ कात्तिक बिहान गोठमा झुण्डिएको अवस्थामा मृत फेला परेपछि एमालेको वडा अधिवेसन स्थगित गरिएको हो ।

शिक्षिका मृत फेला परेपछि अधिकांश प्रतिनिधि सोही घटनाको अनुसन्धानमा व्यस्त भएपछि ८ कात्तिकमा गर्ने गरी वडा अधिवेसन सारिएको एमालेबाट निर्वाचित वडाध्यक्ष यज्ञनारायण श्रेष्ठले बताए । ६ वडा रहेको रावाबेँसी गाउँपालिकाका अन्य वडामा भने ६ कात्तिकमै वडा अधिवेशन सम्पन्न भएको छ ।

जिल्लाको दुई नगरपालिका र आठ गाउँपालिकाको ७९ वडामध्ये शनिबार ६८ वडाको अधिवेशन सर्वसम्मत ढंगले टुंगिएको छ ।

हलेसी तुवाचुङ नगरपालिका-३ च्यास्मीटार, हलेसी तुवाचुङ नगरपालिका-४ बडहरे र हलेसी तुवाचुङ नगरपालिका-११ राजापानी अधिवेशनको बन्दसत्र आइतबार हुने एमालेले जनाएको छ । शनिबार उद्घाटन गरेर बन्दसत्र एक दिनपछि सारिएको हो ।

हलेसी तुवाचुङ नगरपालिका-२ डिकुवा, हलेसी तुवाचुङ नगरपालिका-५ दुर्छिम र हलेसी तुवाचुङ नगरपालिका-८ धितुङको वडा अधिवेशन भने ८ कात्तिकमा सारिएको नेकपा एमाले खोटाङका सचिवालय सदस्य सुरेन्द्रकुमार राईले बताए । वडा अधिवेशनको तयारी नपुगेको भनिए पनि त्यही वडामा सदस्यता विवाद रहेको बताइएको छ ।
यस्तै, दिप्रुङ चुईचुम्मा गाउँपालिका-५ सछितापोखरी र दिक्तेल रुपाकोट मझुवागढी नगरपालिका-८ दोर्पाचिउरीडाँडाको वडा अधिवेशन पनि स्थगित भएको छ । साकेला गाउँपालिका-५ मात्तिम र दिप्रुङ चुईचुम्मा गाउँपालिका-७ टेम्माको वडा अधिवेसनको बन्दसत्र आइतबार चल्ने एमालेका जिल्ला अध्यक्ष रामप्रसाद दंगालले बताए ।

आसन्न १०औं राष्ट्रिय महाधिवेशनअन्तर्गत एमालेको वडा अधिवेशनबाट जिल्लाका २ हजार ४४९ जना वडास्तरीय नेता तथा कार्यकर्ताले वडा कमिटीमा नयाँ जिम्मेवारी पाउँदैछन् । प्रतिवडा ३१ सदस्यीय वडा कमिटीमा वडास्तरीय नेता तथा कार्यकर्ताले नयाँ जिम्मेवारी पाउन लागेका हुन् ।

वडा अधिवेशनले अध्यक्ष, उपाध्यक्ष, सचिव, दुई उपसचिवसहित सदस्य चयन गर्ने छन् । ९ कात्तिकमा पालिका अधिवेशन हुने एमालेले जनाएको छ । एमालेको १०औं महाधिवेशन १० देखि १२ मंसिरमा चितवनमा हुनेछ ।

तपाईको प्रतिक्रिया

पत्रपत्रिका