क्रिकेट रङ्गशालाको प्रारम्भिक प्रतिवेदन : भौतिक प्रगति १४ प्रतिशत, ५१ करोड खर्च

कुलप्रसाद काफ्ले संचारकर्मी
चितवन

भरतपुर महानगरपालिका–१५ रामपुरमा निर्माणाधीन गौतमबुद्ध अन्तर्राष्ट्रिय क्रिकेट रङ्गशालाको बाँकी काम सङ्घीय सरकारले गर्ने भएको छ । रङ्गशालाको भौतिक तथा आर्थिक प्रारम्भिक प्रतिवेदन तयार गरेर महानगरले युवा तथा खेलकुद मन्त्रालयमा पेस गरेको छ ।

रङ्गशाला निर्माणमा पर्याप्त आर्थिक सहयोग उपलब्ध हुन छाडेपछि रङ्गशाला निर्माणकर्ता धुर्मुस सुन्तली फाउन्डेसनले रङ्गशालाको स्वामित्व ग्रहण गरिदिन २ पुसमा महानगरलाई पत्र पठाएको थियो । रङ्गशालाको भौतिक तथा आर्थिक मूल्याङ्कन गरेर महानगरले प्रतिवेदन मन्त्रालयमा पेस गरेको हो ।

महानगरले रङ्गशालाको भौतिक प्रगति मूल्याङ्कन गर्न सघन सहरी विकास आयोजना र आर्थिक प्रगति मूल्याकंन गर्न नेपाल चार्टड् एकाउन्टेड संस्थालाई जिम्मा दिएको थियो ।

प्रारम्भिक मूल्याकंन प्रतिवेदनअनुसार रङ्गशालाको भौतिक प्रगति १४ प्रतिशत छ । रङ्गशाला निर्माणमा हालसम्म ५१ करोड बढी खर्च भएको देखिन्छ । दुई वटै प्रतिवेदन भरतपुर महानगर प्रमुख रेणु दाहालले युवा तथा खेलकुद मन्त्रालयमा बुझाएकी छन् । रङ्गशालाको बाँकी काम सङ्घीय सरकारले गर्ने भएको छ ।

महानगरले प्रारम्भिक प्रतिवेदन पेस गरे पनि उक्त प्रतिवेदन अध्ययन गरेर मन्त्रालयले अन्तिम रूप दिने भरतपुर महानगरपालिकाका प्रमुख प्रशासकीय अधिकृत रामबन्धु सुवेदीले बताए । ‘फाइनल मूल्याङ्कन मन्त्रालयले पनि गर्न सक्छ । हामीलाई प्राप्त प्रारम्भिक प्रतिवेदनअनुसार चाहिँ भौतिक प्रगति १४ प्रतिशत छ’, उनले भने, ‘त्यो प्रतिवेदन मेयरसापले मन्त्रालयमा लगेर पेस गरेका छन् ।’

महानगरले बुझाएको प्रतिवेदनमा मन्त्रालयको चित्त नबुझे मन्त्रालय आफैले पनि मूल्याकंन गर्न सक्ने उनको भनाइ छ । सघन सहरीले तीन दिन अगाडि महानगरलाई प्रारम्भिक प्रतिवेदन बुझाएको हो । आर्थिक मूल्याङ्कनका लागि महानगरले नेपाल चार्टड् एकाउन्टेड संस्थालाई जिम्मा दिएको थियो । संस्थाले आठ दिनअगाडि नै आर्थिक मूल्याङ्कनको प्रारम्भिक प्रतिवेदन महानगरलाई दिएको हो ।

दुवै निकायले बुझाएको प्रतिवेदनमा प्रारम्भिक भनिएको उनले बताए । नेपाल चार्टड् एकाउन्टेडको प्रारम्भिक प्रतिवेदन अनुसार ५१ करोड बढी खर्च भएको देखिएको उनले बताए । रङ्गशाला निर्माणमा लागेको ऋणको विषयमा भने मन्त्रालयले अध्ययन गरिरहेको उनको भनाइ छ ।

‘प्रारम्भिक रूपमा ५१ करोडभन्दा केही बढी खर्च भएको देखिन्छ । वित्तीय प्रगति हेर्न बाँकी छ । ऋण कति रहेछ भनेर स्वतन्त्र अडिटले तयार गर्ने प्रतिवेदनसँग भिडाउन बाँकी छ’, उनले भने, ‘छिटो गरौँ भनेको भएर प्रारम्भिक प्रतिवेदन मन्त्रालयमा पठाइहाल्यौँ । ऋणलगायतका कुरा निकाल्न बाँकी छ ।’

बाँकी कामको विषयमा सरकारले नै निर्णय गर्न सक्ने उनले बताए ।

अनुमानित तीन अर्ब लागतको रङ्गशाला निर्माण गर्दा हालसम्म ५४ करोडभन्दा बढी खर्च भइसकेको फाउन्डेसनका अध्यक्ष सिताराम कट्टेल धुर्मुसको दाबी छ । ५४ करोडमा १७ करोडपति त ऋण नै रहेको उनले बताए । फाउन्डेसनले महानगरलाई स्वामित्व ग्रहण गरिदिन भनेर लेखेको पत्रमा रङ्गशालाको भौतिक प्रगति ३५ प्रतिशत छ ।

रामपुरमा ३० हजार क्षमताको रङ्गशाला निर्माण गर्न भरतपुर महानगरपालिका र फाउन्डेसनबिच १६ माघ २०७५ मा सहमति पत्रमा हस्ताक्षर भएको हो । जनस्तरबाट आर्थिक सङ्कलन गरेर रङ्गशाला निर्माण गर्ने फाउन्डेसनको योजना थियो । यसबिचमा सिर्जित कोरोना महामारीका कारण पर्याप्त आर्थिक सङ्कलन हुन सकेन ।

रङ्गशाला बनाउन महानगरले कृषि तथा वन विज्ञान विश्वविद्यालय रामपुरसँग २० बिघा छ कठ्ठा जग्गा लिएको हो । सहमति पत्रमा हस्ताक्षर भएको दुई वर्षभित्र रङ्गशाला निर्माण सम्पन्न हुने बताइएको थियो ।

फाउन्डेसनका अनुसार रङ्गशालामा तीन हजार दर्शकले बसेर खेल हेर्न मिल्ने प्याराफिट बनिसकेको छ । मैदान पनि तयार भइसकेको छ । रङ्गशालाको लागि ४० हजार जनाभन्दा बढीले आर्थिक सहयोग गरेका फाउन्डेसनले बताएको छ ।

तपाईको प्रतिक्रिया