लिफ्ट खानेपानी आयोजनाको काम अन्तिम चरणमा

सैलुङअनलाइन
सैलुङअनलाइन संवाददाता
चौतारा,सिन्धुपाल्चोक

खानेपानीको चरम अभाव झेलिरहेका सिन्धुपाल्चोकको साँगाचोकमा सञ्चालित लिफ्ट खानेपानी आयोजनाको काम निर्धारित समयभन्दा अघि नै सम्पन्न गर्ने लक्ष्यका साथ तीव्रगतिमा काम भइरहेको छ । जिल्लाकै ठुलो मानिएको उक्त लिफ्ट खानेपानी आयोजनाको हालसम्म ७० प्रतिशत काम सम्पन्न भइसकेको छ । दुई वर्षभित्र सम्पन्न गर्ने गरी २०७५ असारमा ठेक्का सम्झौता भएको आयोजनाबाट आगामी पुसदेखि पानी वितरण गरिने उपभोक्ता समितिका अध्यक्ष दधिराम पराजुलीले जानकारी दिए ।

चौतारा साँगाचोकगढी न.पा. १०, ११ र १२ तीनवटै वडाका दुई हजार २२३ घरधुरीलाई स्वच्छ पिउने पानी वितरण गर्ने सगरमाथा कन्स्ट्रक्सन कम्पनीसँग १५ करोड ६८ लाख रूपैयाँमा ठेक्का सम्झौता भएको थियो । हालसम्म १४ वटा रिजरभ्वाएर ट्याङ्की र ७६ किलोमीटर पोलिथीन पाइप मध्ये मुख्य लाइन र वितरण लाइनको ५० किमी पाइपको काम सम्पन्न भइसकेको छ । मुहानदेखि पाँचौँ स्थानको लिफ्ट गरिने टयाङ्कीसम्म पुग्ने गरी बिजुलीको पोल गाडेर तार तान्ने कामसमेत सम्पन्न भएको छ । आवश्यक पर्ने चार वटा मध्ये ५० को एक तथा १०० केभिएका दुइसहित तीन वटा ट्रान्सफरमरसमेत जडान भइसकेको छ । त्यसैगरी १२ किमी जिआइ पाइप मध्ये आठ किमीको काम भइसकेको छ । एक कार्यालय भवनसमेत सम्पन्न भएको छ । अन्य काम तीव्रगतिमा भइरहेको अध्यक्ष परजुली बताए ।

त्यसैगरी टेको दिने जिआइ पाइपको ३०० स्थानमा काम भइरहेको र एक किमी पहुँच मार्गको कामसमेत सम्पन्न भइसकेको छ । भूकम्पले साविकको मुहान सुकेपछि खानेपानीको चरम अभाव झेलिरहेका स्थानीयवासीले गाउँभन्दा तल पर्ने प्रतिसेकेण्ड १० लिटर पानीको स्रोत रहेको जाडेखोला टुनीबोट मुहानबाट पानी ल्याउने योजना शुरु गरिएको छ । मुहानको पानी ल्याउने योजना शुरु गरिएको हो । मुहानको पानीलाई एकै पटक माथि तान्न सम्भव नहुने भएपछि बीचबीचमा इन्टेक बनाई चार तहबाट पानी तानिने र त्यहाँदेखि एक किलोमीटरको उचाइमा रहेको हर्रे डाँडास्थित रिजरभ्वाएर ट्या्ङकीमा विद्युत् शक्तिबाट पानी सङ्कलन गरिने छ । त्यसरी सङ्कलित पानीलाई शुद्धीकरणका लागि प्रशोधन केन्द्रमार्फत ५० देखि एक लाख लिटर क्षमताका १४ वटा ट्याङ्कीद्वारा वितरण गरिने छ ।

उपभोक्ता समितिमार्फत प्रत्येक घरमा निजी धारा जडान गरिने र सुविधा प्राप्त गर्ने प्रत्येक घर परिवारले अनिवार्यरूपमा १० प्रतिशत जनश्रम व्यहोर्नुपर्ने प्रावधान राखिएको छ । उक्त आयोजनाको २०७५ भदौ तेस्रो सातामा सांसदद्वय अग्नि सापकोटा र शेरबहादुर तामाङले संयुक्तरूपमा शिलान्यास गरेको थियो ।

तपाईको प्रतिक्रिया