नेपाली काङ्ग्रेसका प्रवक्ता डा प्रकाशशरण महतले प्रत्यक्षबाट निर्वाचन लड्ने बताएका छन्। बिहीबार नुवाकोटका पत्रकारहरूसँग आफ्नै निवासमा कुराकानी गर्दै प्रवक्ता महतले सो कुरा बताएका हुन् ।
निर्वाचन आउँदै छ, तपाईँको क्षेत्र काठमाडौँको ५ नम्बर कि नुवाकोटको १ त? पत्रकारले प्रश्न राखे । जवाफमा उनले भने‚‘सल्लाह पनि चलिरहेको छ। साथीहरूको सद्भाव रह्यो भने जाने हो ।’
महतले भने यस पटक आफू प्रत्यक्ष निर्वाचन लड्ने प्रस्ट पारे। काठमाडौँ क्षेत्र नम्बर ५ बाट निर्वाचन लड्ने चर्चा चलिरहँदा महतले गृह जिल्लाबाटै निर्वाचन लड्ने मनसायसमेत राखे।
‘मेरो पहिलो प्राथमिकता प्रत्यक्षमै चुनाव लड्ने हो र जितेर संसद्मा जाने गरी नै तयारी गरेको छु,’ महतले भने।
पूर्व अर्थमन्त्री रामशरण महत स्वास्थ्यका कारण प्रत्यक्ष निर्वाचनमा नजाने बताइएसँगै प्रवक्ता महत नुवाकोट क्षेत्र १ मा दाबेदारका रूपमा देखिएका हुन्। रामशरण प्रकाश शरणका दाइ हुन्।
अरूले टिकट पाए पनि असहयोग गर्ने पक्षमा आफू नरहेको महतको भनाइ थियो । पछिल्लो स्थानीय निर्वाचनमा केही तालमेल नमिलेको उनले स्वीकारे। नुवाकोटमा थप विकासका लागि पनि आफ्नो आवश्यकता रहेको महतको भनाइ थियो।
पाँच दलीय गठबन्धन भएमा भने महत काठमाडौँ ५ बाट भिड्नुपर्ने देखिन्छ। नुवाकोट क्षेत्र १ बाट माओवादीका हितबहादुर तामाङले चुनाव भिड्ने तयारी गरिरहेका छन्। महतले सङ्घ र प्रदेशको निर्वाचनमा पाँच दलीय गठबन्धन गर्ने गरी अघि बढिरहेको बताए।
