बागमती प्रदेशका सामाजिक विकास मन्त्री कुमारी मोक्तानले तामाङ भनेर गौरव गर्नका लागि भाषा‚ संस्कृति‚ पहिचान हुनुपर्ने बताएकी छन् ।
बिहीबार तामाङ चलचित्र सङ्घको २७ औँ प्रदर्शन दिवस तथा तथा टिएफआर सम्मान कार्यक्रमलाई सम्बोधन गर्दै मन्त्री मोक्तानले भाषा‚ संस्कृति जगेर्ना गर्न यस संस्थासँग जिम्मेवारी रहेको बताइन् ।
‘राज्यले प्रोत्साहन स्वरूप हामीलाई केही दिएको छैन र पाइँदैन तर हामीले राज्यको कुनै पनि अङ्गमा सहभागी हुन क्षमताको विकास गर्नुपर्छ ।’‚ उनले भनिन्‚ ‘अहिले स्थानीय तहका धेरै सङ्ख्यामा तामाङहरू निर्वाचित भएका छन् । राज्यको निर्णायक तहमा नेतृत्व गर्ने तहमा पुगेको छ। यस सहयोग गर्न सकिन्छ । ’
‘म अहिले राज्यको कार्यकारी तहमा छु‚ मैले सक्ने सहयोग गर्नेछु ।’‚ मन्त्री मोक्तानले भनिन्‚‘राज्यको तहमा पुग्न प्रक्रियाहरू जान्नुपर्छ । यसमा हामीले ध्यान दिनुपर्छ ।’
मन्त्री मोक्तानले सङ्घर्ष गरेर यो स्थानमा आइपुग्न सफल भएका कलाकारहरूलाई सम्मान प्रदान गर्दा पनि खुसी लागेको बताइन् । उनले आफू जहाँ पुगे पनि धरातल बिर्सनु नहुने बताएकी थिइन् ।
कार्यक्रममा सङ्घले पहिलो तामाङ चलचित्र सेमरी छोरङानका कलाकार लगायत १६ वटा विधामा सम्मान प्रदान गरेका छन् ।
सङ्घका अध्यक्ष एवं सभाध्यक्ष कुमार मोक्तानले कोरोनाका कारण २ वर्षदेखि औपचारिक रूपमा मनाउन नसकेको दिवस मनाउन पाउँदा खुसी लागेको बताए ।
