नेकपा (एमाले) का पोलिटब्युरो सदस्य एवं पूर्व मन्त्री आनन्द पोखरेलले निर्वाचनपछि एमालेले एकल बहुमतको सरकार बनाउने बताएका छन् । मङ्गलवार रिपोर्टर्स क्लब नेपालद्वारा आयोजित साक्षात्कारमा बोल्दै पोखरेलले कुनै दलसँग सहभागी नभई एमाले एक्लै चुनावमा सहभागी हुने बताए ।
‘एमालेको विरुद्धमा सबै दलको गठबन्धन गरिएको छ, र एमालेलाई हराउने लागि परेको छ‚ उनले भन‚ ‘माओवादी काङ्ग्रेससँग लम्पसार परेको छ । एमालेले यो चुनावलाई सामान्य रूपमा लिएको छैन । यो चुनाव त हाम्रो लागि वर्ग युद्ध नै हो ।’
उनका अनुसार गठबन्धन पाँच दलको हो, लोसपा पनि मिसिँदैछ अरे, तर एमालेले यो युद्ध जित्छ । सारा किल्लालाई हामी नष्ट गर्न सक्ने क्षमता रहेको बताए ।
‘हामी अध्यक्ष ओलीकै ब्यानरमा निर्वाचनमा जाँदैछौं । केपी ओली सांस्कृतिक राष्ट्रवादको पनि प्रवक्ताको रूपमा आएका छन् । भपुरिवेष्ठित देशलाई भूजडित बनाउने नेता हो । हामी उहाँको नेतृत्वमा ठुलो सफलता हात पार्छौँ’‚ उनले भने ।
‘अखण्डताको रक्षा र मुलुक आत्मनिर्भरताको लागि, यही एजेन्डा लिएर जनताको बिचमा जानेछौँ । हामी चुनाव जितेर एकल बहुमतको सरकार बनाउँछौँ’‚ उनले भने‚ ‘यो गठबन्धनले निष्पक्ष चुनाव गर्छ भन्ने मलाई लाग्दैन । हाम्रो लागि निर्वाचन जीवन र मरणको सङ्घर्ष हो । निर्वाचन जित्नको लागि एमालेको तयारी छ ।’
उनले एमालेमा धेरै मान्छे प्रधानमन्त्री हुन योग्य रहेको बताउँदै अहिलेको आवश्यकता भनेको केपी ओली नै भएकोले भावी प्रधानमन्त्रीको रूपमा ओलीलाई नै अघि सारिएको स्पष्टोक्ति थियो । उनले एमालेले गलत तत्त्वलाई टिकट नदिने पनि सुनाए ।
