डढेलोका कारण केही नउम्रिएपछि उत्तरी रसुवाको गतलाङ वनमा वन व्यवस्थापनको अध्ययन थालिएको छ ।
डढेलो लागेको १४ वर्ष बितिसक्दा पनि करिब तीन सय हेक्टरमा कुनै झारपातसमेत नउम्रिएका कारण विज्ञटोलीबाट स्थलगत अध्ययन एवं माटो परीक्षण गरिएको हो ।
गतलाङको करिब सात सय हेक्टर जमिनमा रहेको जङ्गल २०६५ सालमा लागेको डढेलो चपेटाका कारण नष्ट भएको थियो । फलस्वरुप समुद्र सतहदेखि दुई हजार पाँच सय मिटर उचाइ क्षेत्रमा अवस्थित बोन्जो माने एवं ज्यार्सा गोठेन सामुदायिक वन क्षेत्रमा कुनै पनि वनस्पति नउम्रिने समस्या रहेको छ । यसै सन्दर्भमा त्रिभुवन विश्वविद्यालय अन्तर्गत वनस्पति शास्त्रको विज्ञ टोलीले गतलाङ पाखामा अध्ययन गरिरहेको डिभिजन वन कार्यालय रसुवाले जनाएको छ ।
डढेलो लागेको गतलाङ पाखामा कुहिएको काठ व्यवस्थापनपश्चात विज्ञको सिफारिसका आधारमा स्थानीय हावापानी सुहाउँदो बिरुवा रोपण गरिने वन प्राविधिकले बताएका छन् ।
यसैगरी स्थानीय बासिन्दाले मसलाका रूपमा प्रयोग गर्ने टिमुर रोपणलाई प्राथमिकता दिइने छ । नीतिअनुरुप जिल्ला वन कार्यालय रसुवाले बहुवर्षीय रूपमा २० हजार टिमुरका बिरुवा उत्पादन एवं वितरण गर्ने तयारी गरेको कार्यालयले जनाएको छ ।
गतलाङ पाखामा विज्ञले गरेका सिफारिसका आधारमा वनस्पति रोपण गरिने जानकारी दिँदै डिभिजन वन अधिकृत अनिल रेग्मी भन्छन्,‘दश सामुदायिक वनमा भने प्राकृतिक रूपले पुनःउत्पादन गराउन विशेष संरक्षणको व्यवस्थापन गर्नेछौं ।’
