अभिनेत्री बेनिशा हमालको निर्देशकीय ‘डेब्यू’ सर्ट फिल्म ‘मिसिङ ब्राइड’ सिनेमा घर एपमा सार्वजनिक भएको छ ।
फिल्ममा वर्षा राउत र विवेक सिंह ठकुरीले प्रमुख भूमिकामा अभिनय गरेका छन् ।
बेनिशाले अभिनयको लामो अनुभवलाई ‘मिसिङ ब्राइड’ निर्माणमा प्रस्तुत गरेको बताइन् । ‘यो मेरो पहिलो प्रयास हो । पहिलो प्रयासमा आफू सफल भएकी छु भन्नेमा विश्वस्त छु ’, बेनिशाले भनिन् । बेनिशाको अभिनय रहेको पछिल्लो फिल्म ‘छक्का पन्जा ४’ले बक्स अफिसमा उत्कृष्ट व्यापार गरिरहेको छ । फिल्ममा पत्रकारको भूमिकामा देखिएकी बेनिशाले कामको राम्रै तारिफ पाएकी छन् ।
फिल्म ‘स्वर’बाट अभिनेत्रीका रूपमा डेब्यू गरेकी बेनिशाले त्यसयता झन्डै १४ फिल्ममा अभिनय गरिसकेकी छन् । १२ फिल्मको अभिनय पछि उनले निर्देशनमा ‘डेब्यू’ गरेकी हुन् । यो सर्ट फिल्ममा बेनिशाकै लेखन रहेको छ ।
बेनिशाकै होम प्रोडक्सन मौरी पिक्चर्सको ब्यानरमा निर्माण भएको फिल्ममा शिवराम श्रेष्ठको छायाङ्कन, प्रवीण श्रेष्ठको सम्पादन र कलर करेक्सन, राजेश शाहको भीएफएक्स छ । केदार भुसाल कार्यकारी निर्माता रहेको फिल्ममा सन्दीप घिमिरेको मुख्य सहायक निर्देशन, किशोर केसी र सदीक्षा गौतमको सहायक निर्देशन, आशिष् पुडासैनीको प्रोडक्सन, नवीन अवालको कला निर्देशन छ ।
यो सर्ट फिल्म सिनेमा घर एपबाट मोबाइल, ट्याब्लेट, आइप्याड र विभिन्न स्मार्ट टिभीमा विश्वभरबाट हेर्न सकिन्छ ।
