राउटे टोलीले भेटे उपप्रधानमन्त्री पोखरेललाई

सैलुङअनलाइन संम्वाददाता
भक्तपुर

उपप्रधान तथा रक्षामन्त्री ईश्वर पोखरेललाई राउटे समुदायको टोलीले भेटेको छ । भक्तपुर दरबार स्क्वायरलगायत विभिन्न स्थानमा आफूहरुले उत्पादन गरेको हस्तकलाका सामग्री प्रदर्शनी एवं बिक्री गर्न प्रकाश शाहीको नेतृत्वमा आएका राउटे समुदायका सहभागीले उपप्रधान तथा रक्षामन्त्री पोखरेललाई भेटेका हुन् ।

भेटको अवसरमा राउटेका टोलीले आसन्न दशैं चाड मनाउन खसीको माग गरेका थिए । प्रकाशसँगै, शिवराज, दीपक र कलम शाहीसहितको राउटेले दैलेखमा ४६ घरधरी भएकाले उनीहरुले एउटा घरलाई एउटा खसीको माग गरेका थिए ।

भेटमा उपप्रधान तथा रक्षामन्त्री पोखरेलले राउटेले बनाएको काठको सन्दुक ३ हजार ५ सयमा खरीद गरेका थिए । चारै जनालाई उपप्रधानमन्त्री पोखरेलले उपहारस्वरुप एक÷एक थान कपडासमेत प्रदान गरेका थिए ।

त्यस अवसरमा सांसद एवं पूर्वमन्त्री महेश बस्नेत, प्रदेशसभा सदस्य शशीजङ्ग थापा, सरस्वती बाटी, जिल्ला समन्वय समितिका प्रमुख नवराज गेलाल, उपप्रमुख सरिता कुवँर, भक्तपुर नगरपालिकाका प्रमुख सुनिल प्रजापति, सूर्यविनायक नगरपालिकाका प्रमुख वासुदेव थापालगायतको उपस्थिति रहेको थियो ।

तपाईको प्रतिक्रिया