बागमती प्रदेश भौतिक तथा पूर्वाधार विकास मन्त्री युवराज दुलालले धुन्चेमा रहेको रसुवा अस्पताललाई स्तरोन्नति गरेर २५ शय्याको अस्पताल बनाउन बजेट व्यवस्थापन गरिदिने भएको छ ।
कालिका गाउँपालिका-१ राम्चेमा दुई दिने स्वास्थ्य शिविरको उद्वघाटन सत्रलाई सम्बोधन गर्दै सबै क्षेत्रका नागरिकले गुणस्तरीय स्वास्थ्य जीवनयापन गर्न सकुन् भन्नका लागि धुन्चेमा रहेको रसुवा अस्पताललाई स्तरोन्नति गरेर २५ शय्याको अस्पताल बताइएको हो ।
उनले स्वास्थ्य उपचारको अभावमा कसैले पनि ज्यान गुमाउन नपरोस् भनी आर्थिक वर्षको बजेटमा २५ शय्या क्षमताको अस्पताल निर्माण गर्न बजेट व्यवस्थापन गरिदिने बताए ।
उनका अनुसार धुन्चे अस्पताललाई सुधारोन्मुख बनाई दक्ष जनशक्ति र प्राविधिक उपलब्ध गराइने नयाँ स्वास्थ्य सङ्गठनको स्थापना समेत गरिने र पाँच वटै गाउँपालिकाहरूमा रहेको स्वास्थ्य चौकीहरूको समेत स्तरोन्नति गर्ने बताए ।
नेपालको संविधानले स्वास्थ्यलाई नागरिकको मौलिक हकको रूपमा लिएको छ । यसैले सबै ठाउँहरूमा स्वास्थ्यको पहुँच पुर्याउन जोड दिनुपर्ने बताए ।
स्थानीय सरकारले नागरिकको आधारभुत स्वास्थ्यको सेवा दिइने‚ प्रदेश सरकारले व्यवस्थापन गर्ने र संघीय सरकारले विशिष्टीकृत स्वास्थ्य सेवा उपलब्ध गराउने संवैधानिक व्यवस्था रहेको पनि उनले जानकारी दिए ।
