मानव अधिकारको विश्वव्यापी घोषणापत्र जारी भएको ७५ वर्षको सन्दर्भमा ‘सबैका लागि मानवअधिकार उत्सव’ भन्ने मूल विषयमा केन्द्रित रहेर नेपाल युरोपियन युनियन फिल्म फेस्टिभल हुने भएको छ ।
युरोपियन युनियन डेलिगेसन टु नेपाल संस्थाले सोमबार लाजिम्पाटस्थित कार्यालयमा पत्रकार सम्मेलन गर्दै सोबारे जानकारी गराएको हो । युरोपियन युनियनका अनुसार फिल्म महोत्सवको पहिलो चरण सुदूरपश्चिम विश्वविद्यालय महेन्द्रनगरमा यही वैशाख १५ देखि १७ गतेसम्म हुँदै छ । महोत्सवको दोस्रो चरण भने वैशाख २०, २१ र २२ गते मध्यपश्चिम विश्वविद्यालय सुर्खेतमा हुनेछ । महोत्सवको अन्तिम चरणको प्रदर्शनी काठमाडौँ चाबहिलस्थित चलचित्र विकास बोर्डको हलमा वैशाख २९ देखि जेठ १ गतेसम्म हुने आयोजकले जनाएको छ । महोत्सवले आम मानिसमा उनीहरूको अधिकारको बारेमा सचेतना अभिवृद्धि गर्दै सबैको मानवअधिकारको रक्षा, सञ्जाल तथा ऐक्यबद्धता निर्माण गर्ने युनियनकी राजदूत नोना डेप्रेजको विश्वास छ ।
महोत्सवमा युरोप तथा नेपालका ख्यातिप्राप्त फिल्मकर्मीहरूले निर्माण तथा निर्देशन गरेका ८ वटा युरोपियन र नेपाली सर्ट फिल्महरू प्रदर्शन हुनेछन् । यसै अवसरमा मानव अधिकार प्रवर्द्धनमा फिल्मको भूमिका’, ‘चलचित्रको प्रशंसा: चलचित्रलाई कसरी बुझ्ने र प्रशंसा गर्ने’ जस्ता विषयक छलफलहरू हुनेछन् ।
नेपाल युरोपियन युनियनले विगत ११ वर्षदेखि महोत्सव गर्दै आएको छ । यसले युरोपियन र नेपाली फिल्म निर्माता तथा फिल्ममा रुचि राख्नेहरूबिच सम्बन्ध एवं सांस्कृतिक संवादको बाटो खोल्न सहजीकरण गरेको आयोजक संस्थाको ठहर छ ।
