दोलखाको चर्णावती धाममा ज्येष्ठ नागरिक सेवा केन्द्र सञ्चालनका लागि आयोजना गरिएको श्रीमद् देवी भागवत महापुराण नवाह ज्ञान महायज्ञमा हालसम्म सहकारी संस्थाहरूबाट मात्रै १ लाख १२ हजार १ सय ११ रुपैयाँ रकम प्राप्त भएको छ ।
शैलुङ गाउँपालिका वडा नम्बर ७ फस्कुस्थित चर्णावती धाममा जारी महायज्ञ तथा धार्मिक अनुष्ठानमा सहकारी संस्थाहरूबाट मात्रै हालसम्म १ लाख १२ हजार २ सय ११ रुपैयाँ रकम आर्थिक सहयोग प्राप्त भएको चर्णावती त्रिवेणी विकास तथा प्रवर्द्धन सङ्घ दोलखाका अध्यक्ष गुणबहादुर बुढाथोकीले जानकारी दिए ।
उनका अनुसार महायज्ञमा जिल्लाको शैलुङ गाउँपालिका वडा नम्बर ७ फस्कुमा रहेको भद्रेश्वर कृषि सहकारी संस्थाले १ लाख १ हजार १ सय रुपैयाँ आर्थिक सहयोग गरेको छ ।
जिल्ला सदरमुकाम चरिकोटमा रहेको हाम्रो हाम्रो जनकल्याण बचत तथा ऋण सहकारी संस्थाले आज ११ हजार १ सय ११ रुपैयाँ रकम सहयोग गरेको छ । उक्त रकम सहकारी संस्थाका अध्यक्ष राजन श्रेष्ठ र सहकारी संस्थाका प्रमुख कार्यकारी दीपक बस्नेत सहितको टोलीले महायज्ञ स्थल चर्णावती धाममा नै पुगेर हस्तान्तरण गरेको हो ।
महायज्ञमा निजी क्षेत्रले आर्थिक सहयोग गर्ने क्रममा बढेको चर्णावती त्रिवेणी विकास तथा प्रवर्द्धन सङ्घ दोलखाले जनाएको छ ।
२५ लाख रुपैयाँ अक्षयकोषमा राख्ने घोषणा
कार्यक्रमको पहिलो दिन आज नै ६ लाख ८२ हजार ७ सय १५ रुपैयाँ रकम नगद आर्थिक सङ्कलन भएको थियो ।
शैलुङ गाउँपालिकाले १५ लाख रुपैयाँ रकम दिने घोषण गरेको छ । पालिकाका अध्यक्ष रिमाल बाबु श्रेष्ठले महायज्ञको उद्घाटन कार्यक्रमको अवसरमा १५ लाख रुपैयाँ रकम अक्षयकोषमा राख्ने घोषण गरिएको हो । त्यसै गरी मेलुङ गाउँपालिकाले ज्येष्ठ नागरिक सेवा केन्द्र सञ्चालनका लागि अक्षयकोषमा १० लाख रुपैयाँ प्रदान गर्ने घोषणा गरेको छ ।
ज्येष्ठ नागरिक सेवा केन्द्र सञ्चालनका लागि आगामी बजेटमा १० लाख रुपैयाँ रकम अक्षयकोषमा राख्ने गाउँपालिकाका अध्यक्ष हिराकुमार तामाङले घोषणा गरेका हुन् ।
आइतबारबाट सुरु भएको महायज्ञ ज्येष्ठ १५ गतेसम्म सञ्चालन हुनेछ ।
