नुवाकोट जिल्ला ककनी गाउँपालिका वडा नम्बर २ का वडाध्यक्ष तिलकबहादुर लामा (रुम्बा) को निधन भएको छ ।
दुबै मिर्गौला फेल भएर उपचाररत लामाको बुधबार बिहान करिब ३ बजे निधन भएको हो । परिवाजनका अनुसार लामाको निधन अस्पतालबाट घर फर्काउँदै गर्दा बाटोमै भएको हो ।
मिर्गौला प्रत्यारोपणको तयारीमा रहेका लामाको मधुमेह र रक्तचाप नियन्त्रण हुन नसक्दा उपचारमा ढिलाइ भइरहेको थियो । परिवार स्रोतका अनुसार उनलाई आफ्नै नातेदारले मिर्गौला दिने भएको थियो र प्रत्यारोपणको तयारी समेत पुरा भएको थियो ।
ककनी गाउँपालिका-२, काउलेथानामा २०३५ साल साउन ४ गते जन्मिएका लामा २०७९ वैशाख ३० गते भएको स्थानीय तह निर्वाचनमा लामा नेपाली कांग्रेसबाट वडाध्यक्षमा निर्वाचित भएका थिए ।
लामाको आजै दिउँसो ३ बजेतिर अन्त्येष्टि गरिने तयारी छ । उनी रेन्बो ट्राउट माछा पालन र स्ट्रबेरी व्यवसायी समेत थिए ।
बुधबार बसेको ककनी गाउँपालिकाको आकस्मिक बैठकले आज शोक बिदा दिने निर्णय गरेको प्रमुख प्रशासकीय अधिकृत गीताकुमारी शर्माले जानकारी दिए । उनका अनुसार गाउँ कार्यापालिकाको कार्यालय, सबै वडा कार्यालय तथा कार्यालयअन्तर्गतका सबै स्वास्थ्य संस्था र शैक्षिक संस्थाहरुमा शोक बिदा दिने निर्णय भएको हो ।
